KDLSA-i sempet balaka aketba tanurtem den sentong agi

Dimapur, January 25 (TYO) : 62 buba Republic Day tenüng nung Kohima District Legal Services Authority (KDLSA)-i Cherry Blossoms School, Kohima nung Differently-abled Children, tsüraburtem aser tesayurtem den sentong ka ayogzüka agi.
January 12, 2017 nü Republic Day benjungmung atema Co-ordination meeting amendang lemzüktsüba nung ajemdaker iba sentong ya ayongzüka agi.
Sentong nung Cherry Blossoms School, Lerie Administrator, Purnima-i tesentepertem pela agizüka jembidang school tem nung sempet balaka aketba tanurtem dendaktsütsüla ta ashi.
School tem nung sempet balala aketertem maniokba ngua 2007 küm lai item tanurtem nem shisaliok angazükdaktsütsü atema mulungtet, ta Purnima-isa ashi.
Tanur ajak dak angazüktsü aser shisaliok bushitsü temeten lir, anungji loktiliba nung parnok asoshi maongka talila agütsütsüla. Sempet balaka aketertem senzüka yutsüba tangatetba ya melenshitsüla, ta laisa shisem.
Sorkari sempet balaka aketertem agizüker ta sayua taoba Nagaland Angh, Aswhini Kumar-i sorkar mapa nung shilem 5 lemzüktsütsü temelaba agütsü. Ibaji mapa küma inyaktettsü atema asenoki parnok nem shisaliok agütsütsüla aser nüngdakba tazüngba jenjang tongdaktsütsüla, ta Purnima-isa ayongzük.
Laisa, KDLSA aser State sorkar dang lar school nung legal awareness program ayongzük agiba atema pelaba metetdaktsü.
Sentong nung Legal Aid Counsel and Trainer, NSLSA, Joshua Sheqi-i ‘Legal responsibilities of Schools and parents of the differently-abled children’ onük jembi, Panel lawyer, Nancy Ezung-i Sign Language indang presentation ka sayu aser tanurtem dang legal awareness dak sendakba documentary films sayua liasü.
Cherry Blossoms School, Kohima nung tang kaketshir 150 tezüngdak lir aser parnok rongnung 33 bo sempet balaka aketertem lir.
Sentong nung tsüraburtem, tesayurtem aser Kohima District Legal Services Authority nungi panel lawyers aser para legal volunteers aden.
Sentong nung mendenji Panel lawyer, KDLSA, Wapangienla liasü aser kaketshirtemia ken ana aten.