Spain nung 3D Printing amshia nisung teküp yanglutet

January 25, 2017 (Agencies): 3D-printing technology amshia, Spain nung scientist telok kati alima nung mezüngbuba nisung teküp yangluteta lir. Iba ajanga nisung temang nung teküp melentsü akoktsü aser chemical tendangba nunga amshitettsü.
Bioprinting amshia yangluba nisung temang shilem rongnung mezüngbuba nisung teküp ya alima nung shishilembaba tesem nung angutsü, ta Universidad Carlos III de Madrid (UC3M) nung department of bioengineering & aerospace engineering indang professor, Jose Luis-i ashi.
Nisung temang nung aliba teküp temaba tang epidermis ta ajar aser iba den teküp temelem aliba ajanga kechisarena ajunga nungi kümzüka ayur.
Teküp telong nung ‘fibroblasts’ ajanga ‘collagen’ yanglur aser iba ajanga teküp atsüshitsü tashi agütsür.
Shiranger temang nung iba teküp ya melena inoktsü akoktsü aser chemical tendangtsü, cosmetics aser mozü balala tendangstü asoshi shishilembaba balala nung amshitettsü, ta Luis-i ashi.
Iba teküp nisung temang nung inoktsü asoshi computer ajanga ‘bioink’ ya ‘print bed’ nung mejanga lia inoktsüba ajanga teküpji akümer.
“Iba teküp yangluba nung nisung indang cells tem amshia yanglu aser iba ajanga nisung temang nung inokba sülen taküm kümdaktsür,” ta iba mapa bushitetertemi osangkaket nung zülutsü.
“Iba bioprinting ajanga pasasa tanga teküp den metenloka aoer aser nisung kisüngi yangluba dang jenjang dalangba asütsü,” ta Spanish Bioengineering intang BioDan Group nung CEO, Alfredo Brisac-i metetdaktsü.
Tang iba maparen ya Europe nung agency balala-i kuli tejangja agüja amshidaktsütsü asoshi shisadangba mapang ka lir.