Sharmila’er party-i o enteptsü jazüker

Imphal, January 25 (Agencies): Election nüboyimba nung maparen tasen ka tenzüka meimchir temeten atema inyakla, Irom Sharmila Chanu-i tentetba party, People’s Resurgence & Justice Alliance (PRJA)-i tanga party tem dang assembly election agitsü lia yimjak nung o enteptsü atema jazükogo.
PRJA Convener aser shisashir, Erendro Leichombam-i, “O entepba ajanga candidate tem tejangraba meteta shisadangtsü atema lanurtem aser nüburtemi sabang angutsü aser state terenlok atema parnok tebilemba onüktem angatettsü,” ta ashi.
Erendro-isa osangbener ka dang, March 4 aser 8 nü assembly election nung parnoki candidate tenet toktepdaktsütsü, ta metetdaktsü.
Harvard nung azünger Erendo-isa, “Parnoki (vote agütsütsüpur) candidate tem dang tasüngdangba balala asüngdangtettsü aser iba nungji ajemdaker shimtsü. Iba ama o enteptsü atema mulungtet telok kari mesüra local club kari ayongzükra PRJA-i kanga pelatsü,” ta ashi.
Iba dak sentakba nung Sharmila-ia, o entepbaji ajanga vote agütsütsüpurtemi yimtenren lenirtem mulungjang metettsü aser parnoki atangji state tenzüknür asü masü’ar ibaji angatettsü, ta ashi.