Manipur election atema app tasen tenzük

Imphal, January 25 (Agencies): Taruba Manipur assembly election nung digital akümtsü nükjidong nung Bodhbarnü state sorkari “e-Manipur election” ta ser mobile application ka tenzükogo, koba ajanga vote agütsütsüpur nem tongtibang osang aika metetdaktsütsü.
Tanü City Convention Centre Hall, Imphal nung 7buba National Voters’ Day sentong nung state Chief Secretary, O Nabakishore-i iba app ji tenzüktsüogo.
Osangbenertem den jembidang App project tongti, Ramayan-i, features karbo state aser linük nung linük tang mezüng tenzüker, ta metetdaktsü.
Paisa ashiba agi, iba ama App ya assembly election mapang Bihar nung mezüng tenzük, iba sülen West Bengal nung tenzüka liasü.
Tesülen Manipur ketdangsertemia Election Commission dang state nunga iba app tenzüktsü mepishia liasü.
Software Education & Resource Private Limited-i yangluba App ya melamela download sütettsü aser iba nung ya features tasen pezü lir, ta Ramayan-isa ashi.
Features tasen pezüji- Voter Slip, polling stations anasatiba, polling station-i aotsü lenmang tuyuba aser WhatsApp ajanga tashishitsü aketba onük benoktsü dena lir, koba ajanga vote agütsütsüpurtemi tamalen dang nungi temelaba vote agütsütsü atema yaritsü, ta paisa ashi.
Iba App tenzüktsüdang Nabakishore-i nüburtem dang state nung election timi agitsü mepishiba den külemi election nung vote agütsütsü temsüa alir ajaki shilem agitsü ayongzük.
Iba sentong ya Chief Electoral Officer, Manipur-i ayongzüka liasü aser National Voters’ Day atema tenangzükba agia sentong tembang.
Manipur nung March 4 aser 8 anogotem nung election agitsü.