Demonetisation ajanga rongsenkettsüng teladak akümtsü: Pranab Mukherjee

New Delhi, January 25 (Agencies): Republic Day atongtsü lia anogo ka jakdang Tir, Pranab Mukherjee-i, demonetization ajanga rongsenkettsüng jenjang ajema kümer asütsüa akok, ajisüaka iba ya ajanga tarutsü nungbo rongsenkettsüng teladak akümtsü, kechiyong sen mamshiba transactions akümtsü, ta ashi.
Kümshia Republic Day nüngtem nung Tir, Mukherjee-i linük nüburtem den jembir, aser tanü pa onük tenzüka pai linük atema taküm tenla agüja asür sepaitem nem akhüm agütsü.
Paisa kiralongra anema nokdaktsü aser parnok anema sashia inyaktsü ayongzük.
Tiri ashiba agi, tang tashi India nunger nütsüng nisung pongu shia nungi kabo kanga sensak tia kübok lir, anungji rongsenkettsüng shilem 10 dak tema aintsü nüngdak, ta ashi.
“Nisung ajak tenük nungi nüktzü aidoktsütsü atema Gandhi nükjidong aliba tang tashi metongteter,” ta Pranab-i ashi.
Linük nüburtem longjemtsü tayongzükba agüja pai, “India nungeri kanga meranga inyaktsüla, kechiyong asen tetsü ka nük nung asenok tanur ajak kasa lir. Asen tetsü taso linüki asenok kija shia dang asenoki kechi shilem agidir agiaka telongjem nung aser temulungtetba nung ochishia inyakdaktsüner,” ta ashi.
“Democracy tajung ka atema akhümtsübutep, taremzüktep aser tangar akhümtsübutsü nüngdaker, aser itemji India nunger mulungjang shia nung alitsüla,” ta paisa ashi.
Paisa, election inyakyim nung temelenshi nüngdaker ta ashiba den külemi Election Commission dang iba atemaji yimtenren party tem den angatettepa inyaktsü nüngdak, ta ashi.
Tamalen Ato kilonser, Narendra Modi-ia, election nung senotsü amshiba inyakyim nung temelenshi den külemi Assembly elections aser Lok Sabha elections külemi agitsü atema temelenshi nüngdak jembia lir.
Asüng Tir, Mukherjee aser Ato kilonser, Modi naprong New Delhi, Rajpath nung Republic Day sentong nung adnetsü. Taküm linük yimtiba nung R-Day sentong nung tongti tesemdanger atema Abu Dhabi Crown Prince, Sheikh Mohammed bin Zayed Al Nayhan jaoka lir.