Dmr nung polling station belenba magizüker

Bodbarnü St. Mary’s Higher Secondary School kaketshirtemi Municipal elections nung parnok school polling station asütsü lemzükba magizüker ta sayua tezülubatem amer tangokba noksa ka angur.

Dimapur, January 25 (TYO) : ULB elections agitsü hopta ka shi dang lia, St. Mary’s Higher Secondary School administration-i parnok school nung polling station asütsü lemzüktsüba magizüker ta metetdaktsüogo.
Dimapur kübok Ward No. 19 nung St. Mary’s Higher Secondary School ji polling station ka asütsü atema tawa tu tetuyuba agüja lir.
January 23, 2017 nü parnok dang shidi ka ajanga MC complex, New Market nung aliba Ward 19 polling station ji parnok school nung asütsü belener ta metetdakja liasü, ta Bodabrnü school administration-i osangbenertem dang ashi.
Iba shidi anguba sülen school administration-i district administration dang school ji ‘residential area’ ka lir anungji tesem melenshiang ta tezüluba ka nung agütsü.
Iba dakji alia, tang school nung model examination tagidak lir aser coaching class atema kaketshirtem school-i arur aser ano CBSE agütsütsü atema telok ka school-i re-inspection arutsüba lir ta shidi nungsa zülur agütsü, ta school administration-i metetdaktsü.
Iba onük atema Ward 19 Council-ia district administration dang St. Mary’s Higher Secondary School nung polling station asütsü lemzüktsübaji meyipa agir akhi ama MC complex, New market nungdang polling station lapokang ta tezüluba ka agütsüogo.
Tesüiba mapang election tem nung MC complex nung polling station lapokbaji public, election duty ketdangsertem aser ozüng amertem, ajak atema tesütep tesem ka ta kuli nguogo, ta Ward 19 Council-isa metetdaktsüogo.