Mokokchung-Mariani lenmang kobi melii National Highway akümtsü

Dimapur, August 12 (TYO) : Tang tashi Border Road Organization (BRO) ajanga Mokokchung-Mariani lenmang anepalur saka iba lenmang ya Department of National Highways, Government of Nagaland-i bendanga agitsü akok.
May 5, 2015 nü Ministry of Road Transport & Highways-i NH No. 702D (Mokokchung-Mariani) lenmang tasen tenzüktsü atema Nagaland sorkar nem tetuyuba agütsü.
August 7, 2015 nü Mokokchung DPDB senden nung iba onük benoka lemsatepdang Executive Engineer NH Mokokchung Division, Er. Chubatoshi-i Department of NH, Government of Nagaland-i BRO ket nungi iba lenmang agitsü atema mapa inyakdar aser kobi melii iba inyakyim tembangtsü ta ashi.
Mokokchung-Mariani lenmang ya kilometre 85 shi lir aser Nagaland nung tongtipang lenmang rongnung iba ya ka lir.
Iba lenmang ya Mokokchung district atema dang masü saka Tuensang, Longleng, Wokha aser Zunheboto district tem atemaa tongtipang lir.