‘Celine Dion Live 2017’ sentong Europe nung akatsü

January 26, 2017 (Agencies): Celine Dion yaküm mei mapang kentenba sentongtem takok ngua agiba sülen la ‘Celine Dion Live 2017’ kentenba sentongtem atema Europe-i ano meyipa aotsü. La UK nung küm 8buba nung tang mezüng kentenba sentong nung shilem agitsüba lir.
Iba sentong nung Europe nung aliba yimti 14 anogo 16 agia asemtsü. June ita nung London O2 arena nung aonung ana atonga kenten sentong agitsü iba sülen July ita nung Manchester Arena aser Birmingham Barclaycard Arena nung kentenba sentong nung shilem agitsü.
“Ni UK aser Europe-i aotsü asoshi kanga yongyar. Yimtitem aser ni sapurtem ajurutsü asoshi matateter,” ta lai osang ka ajanga ashi.
Iba kentenba sentong June 15 nü Copenhagen Royal Arena arena nungi tenzüktsü, aser July 27 nü Birmingham nung atemtsü. Lai iba sentong nung Sweden, Netherlands, Germany, Switzerland aser France nung Paris, Lille, Lyon, Bordeux, Marseille aser Nice nung kentenba sentong nung shilem agitsü. Lai iba sentong nung la indang nüngtugu kentem aika atentsü.
2008 küm ‘Taking Chances’ alima sema kentena senzüba sentong sülen yimti kar nungbo tang ang mezüng asütsü. Iba sentong nung US sen million 279.2 aazüka liasü, aser ibaji solo kentener rongnung sen timtiba aaba rongnung tanabuba liasü.
Europe tour asoshi tickets February 3, 2017 nü nungi angutsü, saka Switzerland sentong atemabo ticket February 1 nungi ang angutsü.