J&K nung rürjep agi sepai 10 anenset

Srinagar, January 26 (Agencies): Kashmir kübok Gurez Sector nung rürjep anenzüka aluba lendong ana nung sepai 10 anensetogo, ta tanü ketdangser kati metetdaktsü.
Yasüng tesü Line of Control anasa Bandipora district kübok Gurez sector nung aliba army camp ka rürjep agi anenbang, ta army ketdangser kati ashi.
Pai ashiba agi, kümzükba maparen tenzükogo aser Junior Commissioned Officer ka densema sepai tenetbo kümzükogo.
“Tanep sepai asem tasümang agitetogo,” ta paisa ashi.
Ketdangserisa, yasüng tesü Gurez sector nung army telok ka patrolling aodang rürjep alua parnok anenbang, ta ashi.
“Lendong atalokba tesem nung kümzükba maparen inyakertemi tang tashi nung tasümang tenet nguogo,” ta ketdangseri ashi.
Yashia central Kashmir Ganderbal district nung rürjep anenzüka aluba lendong balala ana nung sepai ketdangser ka aser kibong ka nungi züngsem pezü asü.