R-Day nüngtem nung Gujarat sorkari tepoukdak alir parnok 439 chioktsü

Ahmedabad, January 26 (Agencies): Republic Day anogomung nüngtem nung Gujarat nung aliba jail balala nung pouka alir 439 chioktsü atema state sorkari telemtetba agiogo; parnok 439 rongnung tesadang ka shibo taküm piyong tepuokdak ayutsü obendang agütsür alirtem lir.
Meimchir temeim nung ajemdaker Chief Minister, Vijay Rupani-i tepuokdak alir parnok 439 dang tai atoktsü lemtet, ta official sangdong ka ajanga metetdaktsü.
Tang mezüng state-i nisung timtiba dang tai atoker, ta kasa sangdong nung shia lir.
Parnok nisung 439 rongnung tetsür 21 densema parnok 243 nembo akumli piyong tepoukdak ayutsü obendang agütsür liasü aser parnokji küm 12 shi tepoukdak alirtem lir, ta sangdong nungsa shia lir.
Ano parnok rongnung nisung 110 bo küm ishishi tepoukdak ayutsü obendanger agütsür alirtem lir aser temerenshi mapang shilem 75 bo temer alirtem lir.
Tanüngba rongnung tebur arishi küm 65 ser temapurtem lir aser January 26 tashi nung tepoukdak küm pongu ajunger arishi küm 60 ser temapur tetsürtem lir.
Tashiyim amshia taküm raksatsüba, nisung aika tepsetba, auyaba aser POTA, TADA mesüra National Security Act kübok ozüng tesashi anema aibelenertem nembo state-i tatok magütsü, ta official sangdong ajangasa metetdaktsü.