UAE-i India nunger agizükba atema pelar: Tir Pranab Mukherjee

New Delhi, January 26 (Agencies): United Arab Emirates (UAE)-i temeim sayua India nunger aika agizükogo aser parnok azükarua alitsü ajungshiogo, aser iba atema onoki chichia nenok dang pelar, ta Tir, Pranab Mukherjee-i UAE linük dang metetdaktsü.
Tang India nunger million 2.6 shi UAE nung lidar.
“Iba nütsüng renloktsü aser aintsü atema ner linüki inyakba atema pelar. Parnok kümzüka alitsü aser junga alitsü atema nai maneni inyaktsü ta ni imlar,” ta Tir, Pranab-i Abu Dhabi Crown Prince, Sheikh Mohammed bin Zayed Al Nahyan dang ashi.
Tir, Mukherjee-i ashiba agi, alia oa inyakba mapatem, kiralongra aser taremzüktep maliba anema longjemer inyaktsü kanga rongdaka kümogo, kechiyong itemji ajanga lokti tashi meitdaktsütsü meranger.
Bodhbarnü Tir, Pranab-i UAE Crown Prince aser Armed Frorces Deputy Supreme Commander, Sheikh Mohammed bin Zayed Al Nahyan New Delhi, Rashtrapati Bhavan nung agizüka liasü, aser paia, linük anapronglai West aser South Asia nung yimjung atema inyaktsü, ta ashi.
Taküm India nunger 68buba Republic Day parade nung tongti tesemdanger atema India-i Abu Dhabi Crown Prince, Sheikh Mohammed jaoka liasü.