Meghalaya Angh V Shanmuganathan agientsü longkak ait

Guwahati, January 26(Agencies): Meghalaya nung lokti balalai Raj Bhawan kima Governor, V Shanmuganathan mapa nungi agientsü asoshi kanga longkak aita nokdak.
Meghalaya, Raj Bhavan nung mapa inyakertemi shidi ka ajanga India Prime minister Narendra Modi dangi Governor mapa nung agientsü asoshi takhangba aguja shidi zülu.
” Onoki pa linük nung tekolak shilem abentsü asoshi metemsü ta amanger. Pa kanga mit tamajung, ochimashi aser tekongtemerang, iba dak alaka pai Raj Bhavan mezüngmeshia tetsür chanutem benjungdak ki kümdaktsüogo,” ta parnok 80-i iba shidi nung zülur yok.
Shanmuganathan-i Meghalaya nung governor mapa May 20,2015 nung agizük aser maneni Arunachal nung J.P Rajkhowa agienba sülen September 16, 2016 nung iba mapa pai repsema abener. Pa iba mapa nung meshim tsüngda pa Tamil Nadu nung RSS nung inyaker ka liasü.
December ita tetsür ka Raj Bhavan nung PRO mapa asoshi aodang Govenor-i la dak kongshitsü merang, ta lai tatsüka lir ashi.
Maneni shidi nung ashiba agi, Governor-i Raj Bhavan nung mapa inyakertem dak temolung melemi Assam rifles nung sepai asem shimok, saka timtem tulutibaji Raj Bhavan nung tetsürtem Governor teteyuba nung kanga sadema oli aruli ta senzür. Pai office nung mapa inyakertem mapa melentsü, aser aiürtem ang pa office nung inyaktsü shimtet.
Mapa inyakertemi ashiba agi, pai tiyazü kanga jembir. Taoba tir asür APJ Abdul Kalam asüdanga pa tasü yipten anasa liasü ta ashi, saka pa mejanga lia Prime Minister-i osang agütsüba sülenang Bethany mozüki bushia ao.