China-i km. 400 aoba air-to-air missile tendanger asütsü akok

Beijing, January 26 (Agencies) : China air force-i rara tesem nungi talangka pilar khalokja lendong aketba tayimtsütem khasatsütetba – km 400 aoba air-to-air missile tendanger asütsü akok, ta Bodhbarnü osangbenertemi metetdaktsü.
China Air Force-i online ajanga lemsatepba noksa ka nung sepaitemi tenüki agi mangutsüsa pilar iba air-to-air missile tendangba lir, ta osangkakettem nunga shia lir.
Iba noksaji yaküm November ita nung ‘Red Sword 2016’ inyakyim dak sendaker tayimtsü exercise agiba mapang tangokba lir saka tawa ang People’s Liberation Army website nung inokja liasü aser noksa nungji engine ana keta aliba J-11B fighter jet ka nung missile tulu ka bener aoba lir. Iba tayimtsüji meter 22 talang lir aser tayimtsü nung sendakloka aliba missile ji iba tayimtsü tasazük pezü sü lemer kasü talang lir.
Tang China nunger fighter jet temi talang nung aliba nükjidong nung khaloktsütsü asoshi PL-11 aser PL-12 missile tem amshir, ajisüaka talangtiba khatetbaji kilometre 100 dang nungi tatsüba aoer.
PLA Air Force nungi nüngdakba oset bushisüngdanger, Fu Qianshao-i, China-i nükjidong tulu khazüka yoktettsü atema missle tasen ka yanglutetogo ta tamang akar. Air-to-air missiles timba kati kilometre 100 shi ang aoer aser tanü asüng yanglutetba ramjets keta aliba missile temi kilometre 200 shi aoer, ta ashi.
Ali nungi khakettsüba, talanglang aoba, ground-to-air missiles-i bo talang nung aliba tayimtsütem dak mekhashir, ta pai shisem.
Ajisüaka tang yanglutetba missile yagibo talangtiba agi kilometer 400 tashi nung aliba nükjidong nung oa khashitsü, aser ibaji anüolen linüktemi amshiba missile tem dang nungi talangba aoba air-to-air missile asütsü, ta Fu-i ashi.
Iba missile ya anüngleni kilometre 20 nungi 50 tashi khakettsüba sülen nükjidong meputet tashi yima atar, aser kodang putetdir oa poksatsütsü. Iba den külemi missile tulu asüba yong nükjidong kanga junga putetba oset dena bener jajatettsü. Item ajak ya keta aliba ajanga iba missile yagi tayimtsü tulu aser tanga oset agi meputetba tayimtsü tem den raratettsü,” ta Fu-isa ashi.