Punjab nung Capt Amarinder Singh Congress CM Candidate asütsü

New Delhi, January 27 (Agencies): Tanü Congress tatong Tir, Rahul Gandhi-i, Punjab assembly election nung Punjab state unit tongti, Capt Amarinder Singh party chief minister candidate asütsü, ta sangdongogo.
Rahul-isa Punjab sorkar tashi nung aliba party, Shiromani Akali Dal (SAD) aser Badals kibong-i temesepba mozü shibelenba aser ochimashi anema meinyaker, ta aitsü.
Majitha nung Rahul-i, “Küm pezü tejaklen ni, lanur shilem 70 bo temesepba mozü agi kongshiogo ta jembia liasü. Iba mapang nungji Badal temi ni asayamenutsü. Tangbo Punjab rangbeni ni tamalen jembiba oji jembir,” ta ashi.
Rahul-isa, kodang aluyimertemi ‘badal’ (mepet) ngudir, parnok mepelar, aser Punjab nung Badal tem dak temeim kangabo mali, ta ashi.
“Parnoki (Badals) Punjab tarutsü tia raksatsüogo. Saka ibaji nüburtem tai masü saka sorkar tai ajanga lir. Onok yagi aruba ya yazü tenangzükbatem nangzüktsü atema aru masü. Sorkari mozü aser ochimashi onük atema süoki ia nendaka inyaktsüla. Congress sorkari dang ibaji takok ngua inyaktettsü,” ta paisa ashi.
Capt Amarinder Singh dak temeyong tulokja Rahul-i, “Punjab Chief minister ji state nungisa asutsü, aser pa yangi mena lir,” ta ashi.
Rahul-i anogo asemnü atema Punjab semdanga lir. Punjab nung Feb. 9 nü election agitsü.