CM & KPC-i asür K.T Thomas mang ayimer

Dimapur, January 27 (TYO) : Hokolbarnep New Delhi nung KT Thomas ajungbena asüba osang angashia temulung raksar, ta Nagaland Chief Minister, TR Zeliang-i asür kinungtsü Mrs Lucy Rengma dangi züluba shidi ka nung shia lir.
“Asür KT Thomas ji ola tanep agi jembir nisung ka aser shia meteter ka liasü. Pa dang nisungtemi Walking Encyclopedia ta aja. Tesüiba küm ishika Hornbill Festival tem amungdang, ni pa den külemi inyaksem aser iba mapang paji temulung lemtetba nisung ka aser pa nem mapa nungloktsüba ka dang tamakok mengudaktsüi inyaker ta ni ajitet” ta TR Zeliang-i ashi.
Paji chichiba Government servant ka liasü aser tangari pa dak nungi ajizüka benshitsüla. Paji tamang nung takang liasü aser mapang ka pai Khristan news agency ka atema Northeast nungi tongti correspondent ka ama inyakogo, ta CM-isa metetdaktsü.
Iba asüku mapang, ni ozü kibong aser Nagaland sorkar tenüng nung ni nür kibong den mangyim tejashi lemsateper aser Tulusangi nenok nem tesünep ngudakjang ta sarasademtsür, ta TR Zeliang-isa Mrs Lucy Rengma dangi züluba shidi nung metetdaktsü.
Kohima Press Club (KPC)-ia sangdong ka nung Director Tourism, Nagaland, KT Thomas ajungbena New Delhi nung asüba atema aoksar aser temulung raksar ta metetdaktsü.
Asür Thomas ji media dena wadang balala nung mongin nisung ka liasü aser pai international & local magazines/journals aika nung ocettemsa zülu, ta KPC sangdong nungsa metetdaktsü.
KPC tentetba mapang KT Thomas ya 2005-07 mapang KPC züngsem ka liasü aser pai club den tesentaktep tajung yua liasü. Pa asübaji Nagaland atema takoksa tulu ka lir aser pai toktsür aoba ongdangji menembangtettsü. KPC-i asür kinungtsü aser kinungertem den mangyim lemsateper aser Tulusangi nenok mulung sünepjang ta sarasademtsür, ta KPC General Secretary, Alice Yhoshü-i sangdong nung shia lir.