NWVA-i teyari balaka nüngdakba tanurtem den R-Day among

Dimapur, January 27 (TYO): January 26 nü 68buba Republic Day anogomung nung Naga Voluntary Women Association (NVWA)-i Kohima nung Spastic Society of Nagaland semdanga liasü.
NVWA Tir, Kevi Rangkau-i, tangar memeneper tanurtem dang temeim sayutsü atema parnoki iba anogomung nung tanurtemji semdang, ta metetdaktsü.
Association tenüng nung lai iba sentong nung shilem agiba tanurtem aser tsürabur ajak nem senotsü aser sempet balala agütsü.
NWVA General Secretary, Kakheli Jakhalu-i, Association indang nükjidongji lenla ajaklen tenla mapa inyaktsü asoshi lir ta metetdaktsü.
Tsüraburtem ajungshia lai, tsüraburtem item ama tanurtem atema shisamebulutsüla, kechiyong Tsüngremer sentongji tulutiba, ta ashi.
Laisa, item ama tanurtem atema shisamebului tsüraburtemi tanur dakji rangloker tajungtiba agi anepalutsüla, ta ashi.
Laisa Spastic society nung executives aser volunteer temi tenla agüja tanurtem kanga nendaka anepalua tenzükba atema pelaba metetdaktsü.
Dr. Nandira-i ashiba agi, tamalenbo Nagaland nung tangar memenepba tanurtem, matamabensa tanurtem ta tetshia liasü, saka tangbo Nagaland densema alima ajak nung item ama tanurtem dang ‘teyari balaka nüngdakba tanurtem’ ta ajar, ta metetdaktsü.
Parnok ama tanurtemji teyari balaka nüngdaka asenok nem moatsü, aser parnokji abnormal masü, ta laisa ashi.
Item ama tanurtem dak sempet balaka lir aser tanur shia sempet balala lir, ta Dr. Nandira-isa metetdaktsü.
Spastic society-i inyakba mapatem metetdakja lai, ‘Parnoki item ama tanurtem tejakleni anir aruteter aser tsüraburtem dang matamabensaba indang angatetdakja, ibaji temenen masü aser Tsüngremi parnok atakatema masü ta tsüraburtem nem angatetdaktsür,” ta ashi.
Laisa, teyari balaka nüngdaker tanur ajak asoshi iba centre kishi lapokja dang lir, ta metetdaktsü.