Village Council-i dang Costumary Act amshitsü tashi lir : S.Chuba Lkr

Mokokchung, January 27 : Tanü Chuchuyimlang Town Town Hall nung Chuchuyimlang Town Adhoc Town Council ta aliba nungi Urban Station jenjangi ajungketba aser ano Veterinary Health Centre ta aliba nungi Veterinary Dispensary jenjangi ajungketba sentong agiogo.
Tanü iba sentong nung tongti tesemdanger Veterinary & Animal Husbandary Parliamentary Secretary, Nagaland S. Chuba Lkr-i jembidang pai Nagaland ajunga nungi Adhoc Town Council nungi Urban Station trok(6) ajungketa liasü aser iba nung 24th Angetyongpang Assembly Constituency nung aliba Chuchuyimlang Town aser Phangsang Town na Urban Station-i ajungketba nungji züngsemogo ta metetdaktsü.
Parliamentary Secretary-isa Nagaland ajunga nung Veterinary Health Centre nungi Veterinary Dispensary jenjangi ajak agi 18 ajungket aser item rongnung Angetyongpang Assembly Constituency nung Chuchuyimlang town aser Phangsang town nung aliba Veterinary Health Centre anaji Veterinary Dispensary jenjangi ajungketogo ta metetdaktsü.
Alima nung inyakyim balala jenti mapang shia ataloka terenlok mapa jenti inyaka alima tejakleni aor, aji asünung sorkar kijai dangbo terenlok mapaji inyaka moteter, anungji terenlok mapa takok ngua inyaka aotsü asoshi nüburtemi sorkar den yariteptsü kanga dang tongtipang ta S.Chuba Lkr-isa ashi.
Yimtsüng ka nung Village Council Chairman aser Gaonbora (GB) temji sorkari shimtetba nübotem lir, anungji Council Chairman aser GB-temi mapatong ajak nung sorkar den yaritepa inyaktsü kanga dang nüngdaker ta Parliamentary Secretary-isa shisem.
Paisa, 1978 küm Area Council Act aser Village Council Act nung kodang jungjunga reprangdangdir yimtsüng nung yimsüsüba menden dak alaka tanga lokti tentet (Apex Body) dak costumary law amshitsü asoshi tashi aguja mali ta shisem.
Iba sentong nung Chuchuyimlang Town EAC Meyazüngba Jamir, Dr. Watitoshi aser Mongsenyimti, Yaongyimti Old aser Chuchuyimlang Village Council nungi jembiba den iba sentong I.Zülutemba Vice Chairman Chuchuyimlang Town-i ketdangsüa ania liasü.
Tanu iba sentong temer külen 29 Buba Chuchuyimlang Senso Telongjem, Chuchuyimlang Town küm tatem lokti senden sentong agia liasü aser iba sentong nunga Veterinary & Animal Husbandary Parliamentary Secretary S.Chuba Lkr tongti tesemdanger süa iba sentong kanga dang takok tulu ngua agia liasü.