Deepika, Ranveer aser Shahid Kapoor nungeri Sanjay Leela Bhansali asem

January 28, 2017 (Agencies): Film yanglur Leela Bhansali aser par teloki Jaipur nung Padmavati film yangluba mapang Karni Seva teloki parnok osettem raksatsüba sülen iba film yanglu anenogo. Karni Seva teloki Rani Padmavati taküm otsü nung ajemdaker yangluba film nung otsü melenshiba dak ajemdaker parnoki film yanglurtem aitsü.
Bollywood nung nüngtugu nisungtem – Priyanka Chopra, Karan Johar, Anurag Kashyap, Anushka Sharma, Rishi Kapoor, Farhan Akhtar, Omung Kumar, Sudhir Mishra, Alia Bhatt, Hrithik Roshan aser Sonam Kapoor nungertem ajaki Bhansali asemba metetdaktsü.
Iba tatalokba süir anogo ka sülen film nung tongti shilem agir Deepika Padukone, Shahid Kapoor aser Ranveer Singh nungertemi twitter ajanga otsü nung kecha temelenshi mali, ta jangjatsüogo.
“Yashi tatalokba ya kanga dang taoksatsü aser tejashitsüka lir. Ni film nung Padmavati shilem agir aser otsü nung khenyongi kecha temelenshi mali ta ni shiteter. Alima dang la tasü aitba aser tashi aitba indang koma atalok aji sayutsübaji film nükjitong lir,” ta Deepika-i tweed asü.
Ranveer shiba iba film nung Alauddin Khilji shilem agir pai ashiba agi film yanglurtemi Rajasthan nunger aser Rajput lokti temolung meyirudaktsütsü asoshi kanga kümdanga iba film yanglur. Maneni Sanjay ya film yanglur rongnung kanga dang nüngtugu aser otsü tejangja meteter ang film yangluba nisung ka lir, ta pai Sanjay sema ashi.
“Rarapangsen aser azütokshibaji lokti-i magizüker. Nisungtemi par lokti koleni aoer aji angateta meyipba reprangshitsüla,” ta Shahid Kapoor-i ashi. Pa iba film nung Rani Padmini kinungbo Rana Rawal Ratan shilem agir.
Padmavati film ya Rani Padmini otsü nung ajemdaker yangluba film ka lir. Rani Padmini chuba Alauddin Khilji kübok nung malitsü asoshi la den külemi tangar tetsür aika, Khilji-i anir par sepaitem Chittorgarh amaki arudang parnok sasa tepseta asüba otsü ka lir.