State tem dak nashi tepsetba nokdangtsü temeten lir: SC

New Delhi, January 28 (Agencies): Ozüng alema state tem tsüngda nashi shibelenba nokdangtsü atema linük tesem ajaklen nashi tepsetba khenyongi nokdangtsü asoshi temepishiba ka benoka liasü, ajisüaka Hokolbarnü Supreme Court (SC)-i iba temepishibaji magizük.
Temepishiba benoksang, Vineet Sahai’er counsel Sarvesh Bisaria dang Chief Justice J S Khehar aser Justice N V Ramana nati akumba bench-i, “State kati ibaji nokdangtsü akok, ano state katibo iba telemtetbaji magizüktsüa akok. Item telemtetba nung onoki tiyongi aittsü makok,” ta metetdaktsü.
Bisaria-i ashiba agi, state aika nung nashi tepsetba nokdangogo, saka tang tashi state karibo melar. “Ibaji ajanga nashi tepsettsü nokdanga aliba state tem nungi ozüng alema nashi tepsettsü melaba state temi nashi belener. Iba dak alia state tem tsüngda nashi belenba atema ozüng mali,” ta ashi.
CJI-i Bisaria dang, yaküm July ita nung SC-i Centre aser state tem dang state tsüngda aser arrtsü adena ozüng alema nashi belenba nokdangtsü atema ozüng yangluang ta tuyuogo, ta metetdaktsü.
“Ozüng alema kiset shiruru belenba nokdangtsü atema state temi committees tenteta lir,” ta bench-i shia iba temepishibaji magizük.
Tang nashi tepsettsü melaa aliba state temji- Kerala, West Bengal, Nagaland, Mizoram, Meghalaya, Tripura, Arunachal Pradesh aser Sikkim lir.