Mizoram nung ketdangser ka mapa nungi anentsü

Aizwal, January 28 (Agencies): Mizoram nung sorkar ketdangser kati taila institution ka den tezüngzüktep yanglua state sorkar sen lakh 128 akoksadaktsüba ken o nung pa mapa nungi anentsüogo.
Additional Secretary for Information and Communication Technology Rotluanga yasüng pa mapa nungi sorkari anentsü.
Rotluanga-i 2014 küm Director of Labour, Employment and Industrial Training mapa bener alidang pai iba tezüngzüktepji Kolkata nung amenoka aliba Nalanda Institute of Advanced Studies (NIAS) den agi.
Mizoram Building and Other Construction Workers Welfare Board (MBOCWWB)-i yaria Mizoram nunger shisaluyimer par 32 Bachelor of Hotel Management agitsü asoshi yok. Parnok tazüngba nung küm ka tsüngda sen lakh 128.20 indok, saka West Bengal sorkari NIAS ya taila institute ta sangdongba sülen parnok tazüngba medemteti meyipa aru.
Maneni kaketshirtemi aser Opposition party-i LE and IT Minister Lalrinmawia Ralte aser Mizoram Youth Commission Chairman T Sangkunga kaketshirtem kangshidaktsüba asoshi mapa nungi anendaktsütsü asoshi akhanger.