Arsene Wenger asaya 4 asoshi nokdang

London, January 28 (Agencies): Arsenal manager Arsene Wenger Football Association (FA) temzüng nung memelaba yimya benshiba pai nangzükba sülen, pa asaya 4 asoshi ground telong nung manager shilem agitsü nungi nokdang.
Deobarnü Premier League asaya nung par teloki Burnley akokba asaya nung pai fourth official ka nungdokba ken o nung iba tenokdangba agütsü.
Deobarnü asaya tatemtsü lia Burnley nem penalty ka agütsüba agi, pai tejashi nung fourth official Anthony Taylor mezüngmeshia o jembiba ajanga pa asayaba tesem nungi tugudaktsü.
Maneni technical tesem nungi tugudaktsüba sülena, pa yimya memelenshi-i pai fourth official ka dak anungba ajanga FA temzüng nung aliba ama, pa Hokolbarnü aitsüogo. Iba dak sendakba ken o nung pa dang sen pound 25,000 ($31,342) senchi achi.
Arsenal telok FA Cup round 4buba nung Southampton den Honibarnü asayatsü, Watford den anogo 3 lir Premier League asayatsü, Chelsea den February 4 nü asayatsü aser iba sülen hopta ka lir Hull City den asayatsü aliba nung pa manager ka ama shilem magitettsü.