NIA tongti Kumar-i Pak kiralongrar Javed dang asüngdangyaogo

Jammu, August 12 (Agencies): Tanü NIA tongti, Sharad Kumar Jammu-i tayimtsü ajanga aruba sülen LeT kiralongrar aser Pakistan telungpur Mohammed Naved Yakub dang asüngdangyaogo.

Tanü 11:30 ako meta Kumar Jammu tonga aruba sülen pa Miran Sahib nung aliba Joint Interrogation Centre (JIC) tonga oa Pakistan nunger kiralongrar Javed dang asüngdangyaogo, ta osang ka ajanga ashi.

Iba sülen pa Udhampur district-i oa BSF sepai ana aser kiralongrar ka kasetba tesem tonga oa semdangogo.

Osangbenertemi asüngdangba ka langzüdang Kumar-i, iba tatalokba tejangja metettsü aser iba ken o pa nija-i reprangdangtsü atema aru, ta ashi.

NIA osang ajanga ashiba agi, Javed dang maneni asüngdangyatsü asoshi pa Delhi-i anir aotsüa akok.

NIA tongti Kumar-isa NIA ketdangsertem den senden ka mena iba ken o atema lemtepogo aser iba dak sentakba nung Kashmir Valley nung nisung aika pua aliba onük-a lemtepa liasü.

Kiralongrar Naved apuba sülen NIA aser Jammu & Kashmir Police-i tang tashi nung nisung 11 pua asüngdangyaogo.

“Iba ya onok asoshi kanga tongtibang onük ka lir aser bushisüngdang ajungaji scientific yimya nung agitsü,” ta Kumar-i shiogo.

Yashi Jammu nung special court kati Central agency ket nung Naved anogo 14 ayutsü tuyua liasü.

August 05, 2015 nü Jammu & Kashmir, Udhampur nung Narsoo Nallah anasa Jammu-Srinagar highway nung kiralongrartemi BSF sepaitem amakba mapang kiralongrar ka kahset aser Javed pua liasü.