NBCC-i Khristan tem dang sarasademtsü ayongzüker

Dimapur, January 28 (TYO) : ULB election dak sendakba mangatettep atema Nagaland Baptist Church Council (NBCC)-i tebilemtsü khuret tulu abener aser telok ajak dang aremzükteptsü aser angatettepa tensa tajungba kümdaktsütsü mepishir, ta NBCC sangdong ka nung metetdaktsü.
“Olemtep balala agiyonga aruba nung taginütsüsa telemtetba ka dangi marutet tembangogo, ajisüaka asenok kati ka dak tai metongloktsütsüla, kechiyong tai tongloktsütepba ajanga asenoki iba tensa ajuruogo. Tangatettep nung iba ken o tembangtsü ta nübortemi teimla liasü saka iba amaji mesüteti mangatettep nungang tembangogo. Ajisüaka, asenoki Tsüngrem dak teimla mesamai lir. Iba ama tensa nung Khristantemi Tsüngrem dang nendaka sarasademtsüla aser Pa dang nungi teyari meshitsüla” ta NBCC-isa sangdong nung ashi.
Tan Deobar (January 29, 2017) nü NBCC-i arogo ajak nung state sorkar nung asen lennirtem asoshi sarasasemtsütsü ayongzüker. Iba ama asen putiotsü nung tongtipang mapang ka nung parnoki telemtetba shitak agitsü atema shisatsü agüjang ta asenoki sarasademtsüdi, ta NBCC-isa metetdaktsü.
Ano külen, asen kin balala nungi lennirtemi asenok asoshi nokdaker, anungji Tsüngremi parnok nema tangatetba agüjang aser parnok temulung anüka kümdakjang ta asenoki sarasademtsüdi, ta NBCC-isa ashi.
“Tsüngremi asenok dang aochia tatok agütsütsü atema asenoki Pa dang tatok meshia sarasademdi aser asenok putepshir tensa tajungba küma asenok liyonga aotsü atema tangatetba meshidi. Asenoki dang nendaka Tsüngrem dang meshira, Pai asenok senzüka meyutsütsü. Pai asenoki ashiba angatsü kechiyong asenok teimla Pa dang ta Pai meteta lir,” ta NBCC-isa ayongzük.