Tir Pranab-i polio immunization programme tenzüktsüogo

New Delhi, January 28 (Agencies): Honibarnü Tir, Pranab Mukherjee-i 2017 küm atema pulse polio programme tenzükja Rashtrapati Bhavan nung arishi küm 5 ser tekübok tanurtem nem polio agütsü.
Iba programme ajanga linük nung arishi küm 5 ser tekübokpur tanur crore 17 ayimjemtsü.
Mukherjee-i iba sentong ya National Immunization Day atongtsü anogo ka lia tenzüktsü aser iba sentong nung Health minister, JP Nadda aser Ministers of State for Health Anupriya Patel aser Faggan Singh Kulaste nata liasü.
Linük asem- Pakistan, Afghanistan aser Nigeria nungi maneni polio menazüktsüsa lir ta tekümdangtsü shia Union Health Minister, Nadda-i, vaccine tasen aika bendenlokba ajanga sorkari immunization programme tashi itshiogo, ta metetdaktsü.
“Tang tashi Polio virus aliba tanüngba linük asem (Pakistan, Afghanistan aser Nigeria) nungi maneni polio menazüktsüsa lir, anungji alima rangben nung polio mesamatsü tashi linüki maneni iba atema inyaktsüla,” ta paisa ashi.
India densema South-East Asia Region-i 2014 küm March 24 nü polio-free certificate angubaji anema alibaren tsütsü putiotsü nung alizüng tuluka tongtetba lir, ta paisa ashi.
Pai ashiba agi, linük nung tanur asüba ajema akümtsü atema yaküm Univeral Immunization programme (UIP) nung Rotavirus virus vaccine bendenlok.
“Kobi melii Ministry-i Pneumococcal Conjugate Vaccine bendenloktsü, koba ajanga diarrhea, pneumonia aser meningitis ajema akumtsü aser linük tesem ajaklen mapang lemsar Measles-Rubella vaccine campaign akatsü,” ta Minister-isa metetdaktsü.