Osangbenertem amokmerenba aitsür: DPC & NPA

Dimapur, January 28 (TYO): Honibarnü Dimapur jila nung mokdangba mapang nisung kari osangbenertem merenshiba atema kanga sasaa bilemer, ta Dimapur Press Club (DPC)-i sangdong ka nung metetdaktsü.
Osangbenertemi parnok indang ‘Identify Cards’ sayuaka volunteer kari parnok dang kangabo mesenzütsüla ta amokmerena ashi aser ano nisung karibo Press indang gariji rongdoktsütsü ta amokmeren, ta DPC sangdong nung shia lir.
Joint Coordination Committee (JCC)-i mokdangba nung Press purtem tenokdangba küboki maiter ta jangjangja metetdaktsüogo aser iba jagi osangbenertemi pei teinyaktsü mapa inyakdang parnok nokdangbaji shisamaka inyakyim ka lir. Anungji, bangdak teloktemi osangbenertem timtem melii osangtem bendena senzütettsü asoshi pei züngsemtem nem tetuyuba agütsütsüla, ta DPC-isa mepishia metetdaktsüogo.
Nagaland Press Association (NPA)-ia tanga sangdong ka nung, January 28 nü Joint Coordination Committee (JCC)-i ayongzüka agiba mokdangba sentong nung nisung kari media nisungtem den o tamajung jembiba osang angashia kanga aoksar aser jashir, ta metetdaktsüogo.
Osangbenertem pei lemzükba mapa inyakdang nisung kari parnok dang o tamajung shia amokmerenbaji media nisungtem mezüngmeshiba inyakyim ka lir aser iba tatalokba aitsür ta NPA-isa ashi. JCC lennirtemi pei volunteer-tem azüoktettsü aser parnoki tangatettertem ama tarutsü nungbo inyaka otettsü imlar, ta Nagaland Press Association (NPA) sangdong nungsa metetdaktsü.