Malaysia:Lendong ajuruba rong mena alir nisung 4 mangur

January 29, 2017 nü Hutan Melintang, Malaysia nung rong meküpokba tesem nungi tekümzükertemi tasümang ka bener aruba noksa nung angur.

Kuala Lumpur, January 29 (Agencies) : Deobarnü China nunger raliwalirtem aika mena aliba rong ka Malaysia tzü nung meküpok, ta Malaysia nung osangbenertemi ashi.
Iba rong nung mena alir parnok nisung 31 rongnungi par pezübo tang tashi mangu bushidar, ta online osang ka ajanga metetdaktsü.
Rong anisang aser pa den külem inyakertembo Deobarnü kümzük, ajisüaka tanüngba nisungtemji tzü nung tekümzüker aruba ata liasü, ta ketdangsertemi ashi.
Sabah state nung Assistant Tourism Minister Datuk Pang Yuk Ming-i, Deobar nikongdang parnok rongnung nisung 25 kümzüka anir aruogo, ta ashi.
“Parnok timba ka Labuan tezülen aliba tzü nungi kümzüka anir aru. Parnok ya tzü nungji nisung pungugu mesüra terer küma telong dener liasü,” ta Pang-i ashi.
Malaysia nunger navy aser police indang rongtem aika den tayimtsü ka dena iba rong bushidar, ta Malaysia Maritime Enforcement Agency sangdong ka ajanga metetdaktsü.
Maritime ketdangser kati ashiba agi, South China Sea nung square kilometer 1,400 shi telongtet nung iba rong bushidar saka tzü nung ajungbena tzüsem aruba aser mopung tesashi aonba ajanga tekümzükertem mapa sadema meinyakteter.
Rong anisang aser pa den külem inyakertembo Deobarnü Pulau Tiga asetkong aser totzü atsütetba tesem na yongtsü nung angu, ta osang ajanga ashi.
Iba rong ya Sabah state kübok Kota Kinabalu tesem nungi Honibar anepdang apusoa kilometre 60 pilar aliba Pulau Mengalum tesemi aodang lendong atalok.
Rong anirtemi rong nung mena alirtem life jacket semer kümzüktsü merang, ta Chia nungi TV osang ajanga metetdaktsü.
Honibar aonung phone ajanga iba lendong osang angashiba sülen Malaysia-i tekümzüker rong aser helicopter tem lendong atalokba tesemi yok, ta osangbenertemi ashi.
Pulau Mengalum-isa aoba rong ka anir, captain Arwin Musbir-i, ni iba rong sülen anidaka aotsü liasü ajisüaka rongji apusor külen mapang tatsüka tang lirbo mongui aküm,” ta ashi.
Iba rong nung China nunger nisung 28 den rong anirshir aser acha ayanger parnok nisung 3 mena liasü, ta Maritime agency nung ketdangseri kati pa tenüng meshii ashi.