EC-i Delhi CM Kejriwal anema FIR tetuyuba agütsü

New Delhi, January 29 (Agencies): Election Commission-i Goa nung election ketangsertem dang Delhi Chief Minister, Arvind Kejriwal-i state nung süpokrem atema jembiba o anema FIR benokang, ta tetuyuba agütsü.
Election Commission-isa, ibaji “tashishitsü o lir”, AAP leniri item ama o jembiba menokdangra Commission-i süpokrem ajungshir lir, ta ashi.
Election Commission-isa, Representation of the People Act nung vote agütsütsüpur nem süpokrem agutsüba dak sentakba ozüngtem aser Indian Penal Code nung tapet ozüngtem nung ajemdaker AAP lenir anema ken o benokang, ta tetuyuba agütsü.
“Delhi Chief Minister ka, aser Goa nung AAP atema tongti nüboyimer ka asünungji, pai (Kejriwal) election nung ozüng kübok tatishitsü tajung sayua nüboyimtsüla, koba ajanga tangari pa dang nungi tatishitsü tajung agitsüla, ajisüaka pai aiben Model Code of Conduct anema inyakogo,” ta EC-i metetdaktsü.
“Commission-i item o atema Arvind Kejriwal anema FIR/ken o agütsütsü tuyur. Iba dak sentakba nung January 31 nikongdang 3:00 ako tashi nung Commission nem osang agütsütsüla,” ta Election Commission-isa metetdaktsü.
Goa nung dang masü saka Punjab nunga Kejriwal-i vote agütsütsüpurtem danga, tanga yimtenren party temi agütsüba sen agiang, ajisüaka AAP nem vote agütsüba ajanga parnok ashiokjang, ta jembia liasü.
Iba ama o jembiba atema Goa Election Commission-i Kejriwal dang tekümdangtsü o ashiba sülen anogo ishika tsüngda pai ano maneni tashishitsü o jembia liasü.
Punjab, Jalandhar yimti nung election nüboyim sentong ka nung jembidang, Kejriwal-i, “February 4 nü state nung assembly election agitsü. Party ajaki nenok nem sen agütsütsü. Ibaji agizükang, saka AAP nem dang vote agüjang,” ta jembi.
January 9, 2017 nü Goa Chief Electoral Officer, Kunal-i, “Kejriwal-i nüburtem dang vote atema sen meshiang ta jembiba osangji ni nguogo, anungji ni iba osangji Election Commission of India nem agütsütsü,” ta metetdakja liasü.