Cong-SP-i menden 300 dak tema angutsü: Akhilesh

Lucknow, January 29, 2017: Deobarnü Uttar Pradesh yimtiba,  Lucknow nung Samajwadi Party (SP) tongti aser state Chief Minister, Akhilesh Yadav aser Congress Party tatong Tir, Rahul Gandhi nati külemi osangbenertem senden ka nung jembiba noksa nung angur. 

Lucknow, January 29 (Agencies): Deobarnü Uttar Pradesh Chief Minister aser Samajwadi Party, Akhilesh Yadav-i, state assembly election nung Samajwadi Party-Congress teloktepi menden 300 dak tema nung takok angutsü, ta ashi.
Tanü Lucknow nung osangbenertem senden ka nung Congress tatong Tir, Rahul Gandhi aser Akhilesh Yadav nati külemi jembia liasü.
Akhilesh-i, Uttar Pradesh nüburtemi telemtetba agiogo aser tang tasen teloktep party pusemer, ta ashi.
Osangbenertemi Akhilesh dang, tesüiba küm pongu tsüngda ner sorkari inyakba mapatem atangji, ta nai shitetra kechiba nai Congress den loktep?, ta asüngdangba langzüdang arishi küm 43 Chief Minister Yadav-i, item mapa tajung tejakleni bener aotsü atema teloktepji nüngdaka liasü, ta ashi.
“Onok kijai majority angutsü ta meteta lir. Ajisüaka tang tekapu (Congress temaitsü) Cycle (SP temaitsü) adenba ajanga onoki menden 300 dak tema angutsü imlar,” ta Akhilesh-isa ashi.
Rahul Gandhi-ia, Congress aser Samajwadi Party naji cycle tetsüng ana mesüka lir, aser ibaji junga tejakleni odar, ta ashi.
Congress lenirisa, party ana longjemer telemsa adokdaktsüba party tamakok ngudaktsütsü, ta ashi.
Osangbenertem senden tembangba sülen Gandhi aser Akhilesh Yadav nati road show nung shilem agi.
Road show nung Congress züngsemtem dang nungibo Samajwadi Party pusemertem kanga agi timba liasü.
Kilometer 12 road show ji Hazratganj nungi tenzük aser yimti nung tesem aika sema senzü.
Priyanka Gandhi-i Uttar Pradesh election atema nüboyimtsütsü asü, ta asüngdangba langzüdang Gandhi-i, “Priyanka-i ni kanga yaria arudar aser ni-a la yaria arudar. Lai nübo yimtsütsü mesüra meyimtsütsüji la melung. Laji Congress atema senti lir,” ta ashi.
Akhilesh aser Gandhi napronglai, election atema loktepba sülen tena nija aser yimtenren tesendaktep tajungba kümogo, ta ashi.
State nung assembly menden 403 lir, aser SP-i Congress nem menden 105 agutsü aser tanüngba mendentem nung parnoki tokteptsü.
February 11 nungi tenzüka state nung shilem tenet lemsar assembly election agitsü.