Biren Singh-i Manipur nung mepetmesü atema Congress aitsü

Imphal, January 29 (Agencies): BJP atema otongdar Nongthombam Biren Singh-i Manipur nung mepetmesü atema Congress aitsü.
United Naga Council-i national highway anogo 89 buba nokdanga ayuba ajanga Manipur nung oset balala agi kanga anünger.
Iba tebilemtsü ya 1992 küm Naga Students’ Federation (NSF) den taoba chief minister aser iba mapang nung deputy chief minister alisang Rishang Keishing-i tenangzüktep yangluba nungi adok, ta Biren-i ashi.
Iba senden nung telemtetba kaji, Kuki nungertemi parnok atema Sadar Hills district balaka meshiba dak sendaka liasü.
1992 küm November 10 nü tenangzüktep agiba arrla nung yamai zülua lir, “Kechi tensa ka ajurudir ajuruaka Naga nunger litsü inch ka danga magütsütsü, ta NSF-i nenshia ashir; aser tarutsü nung mangatettep kecha madoktsü atema state sorkari iba ama takhangbaji (Sadar Hills district tentettsü takhangba) magizüktsü.”
“Naga nunger lokti kati Manipur nunger ken o nung jangjungba aser state sorkari ibaji pusema, deputy chief minister aser chief secretary nati tenangzüktep agiba nung sign asü. Iba ji aibelen ka liasü,” ta Biren-i osangbenertem dang ashi.
Senapati district nungi Kuki nunger longsoa aliba tesem nung Sadar Hills district tentettsü asoshi Naga nungeri anema aru, kechiyong iba liji parnok tetsü tebou nunger li lir, saka Okram Ibobi Singh sorkari December 8 nü district 7 tasen tentettsü, koba nung Sadar Hills densema lir. Iba district nüngja Kangpoki ta jatsü.
NSCN (I-M) aser Naga nunger lokti balala ajanga Naga nunger ajak yimsüsüba ka kübok bener arutsü merangba tensa ka nung, Manipur nunger litsü wazüka ayutsüji, political party ajak indang manifesto nung tongtipangtiba onük ka kümogo.
Taoba MLA Biren Singh-i chief minister Okram Ibobi Singh doktsür yaküm December nung BJP nung aden.
Pa Imphal East district, Heingang constituency nungi asemben atonga adok, aser taruba election nung BJP nungi tokteptsüba candidate 31 rongnung pa züngsema lir.
Chief ministerial candidate atema BJP-i mesangdongtsü, ta paisa nenshia metetdaktsü.