NCRC-i tenüngsang agütsüba sentong ayonger

Kohima, January 29 (TYO) : Nagaland Christian Revival Church (NCRC)-i “Revival & Healing Convention” sentong takok tulu ngua mungtetba atema February 05, 2017 nikongdang 3:00 ako nungi CRC, Kohima Village nung “Tenüngsang Agütsüba” sentong ka ayonga akatsü.
Arogotem, kibongtem aser kija ajaki parnok rongsen aser mapang tenlaba den sarasadem nung maneni nungita yariba ajanga “Revival & Healing Convention” sentong kanga takok ngua mungtetogo.
Iba sentong nung teyari balala agütsürtem ajak dang kanga pelar aser ano balakata Rüzhükhrie Govt. Hr. Sec. School aser Nagaland nung Osangbener telok danga pelaba metetdaktsür, ta sentong Convener Rev. Dr. Neivotso Neikha aser Secretary Müdohü Kezo nari sangdong ka ajanga metetdaktsü.
Revival & Healing convention ya January 19 nungi 22 nü tashi Rüzhükhrie Govt. Higher Secondary School moapu, Kohima nung agia liasü.
Anungji Organising Committee-i iba tenüngsang agütsüba sentong nung nüburtem ajak arua dena Tsüngrem temoatsü agitsü pelashishia jaoker, ta tenati sangdong ajangasa ashi.