Lions Club, Kohima-i TB Hospital, Khuzama semdang

Kohima, January 29 (Agencies): Lions Club of Kohima (LCK) Tir, Lion Tali Jamir-i anir LCK züngsemtemi Republic Day benjungmung nüngtem nung January 26 nü TB Hospital, Khuzama semdanga liasü.
Sentong tatsüka agiba sülen Club züngsemtemi shirangertem aser nurse tem nem entzü, nanglong, chiyungtsü lemtsü, aser parnok den mapang intoka among.
TB Hospital, Khuzama nung Doctor tem aser Nurse temi shirangertem anepaluba atema pelaba metetdakja LCK Tir, Lion Tali Jamir-i shirangertem dang, tanüasüngbo parnok tashidakji imlaba dang nungi tekaraba aneptsü akokba tashidak ka lir, anungji iba atemaji shisabulutsü menüngdak, ta ashi.
Paisa, Mental Hospital, Leprosy Colony, Old Age Home, Orphanage nung tanurtem semdangba aser tang tesüsa parnoki TB Hospital, Khuzama nung shirangertem semdangba dak alia lendong aser alima lendong balala nung Lions Club of Kohima-i temeim mapa balala inyakba indang metetdaktsü.
TB Hospital, Khuzama nung Assistant Nursing Staff, Atemla-ia Hospital tenüng Club Tir aser par telok dang shirangertem semdangba aser Nurse aser Doctor tem atema tajung bilemtsüba atema pelaba lemsatep.
Iba sülen Club züngsemtem aser nurse temi longjemer shirangertem tekaraba nung taneptsü angutsü aser nurse aser doctor tem anema alitsü asoshi sarasademtsü.
Club Tir den Lion Tali Tensu Jamir, Lion Oken Jeet Sandham aser Green Lions tem aden.