Mark anguba dang nungibo shisatsü tongtibangba: PM Modi

New Delhi, January 29 (Agencies): Tanü Ato kilonser, Narendra Modi-i kaketshirtem dang, tatidangtemji ‘kuli ka ama masü saka tejangraba ka’ ama züngshitsüla; mark anguba dang nungibo shisatsü angubaji tongtibangba,’ ta metetdaktsü.
Ita shia agiba radio sentong ‘Mann Ki Baat’ ajanga kaketshirtem dang Modi-i, “Imlabaji timtem balala ajak atema tera masü. Tangar den toktepba ajanga na mepeladaktsütsü akok mesüra nükmeremtsüa akok. Nü den toktepang aser nai tashi angutsü aser tajungtiba atema merangtsü,” ta ashi.
“Koma meranga inyaktsü, iba atemaji temulung agüjang aser nü shisatsü rendakjang. Tatidang nung mark tajung angur kar dang lir, saka atangji taküm nungbo tamakok angur,” ta paisa ashi.
Iba sentong nungsa pai Jammu & Kashmir nung rüjep agi anenseta asür sepaitem bilemteta, “Asenok pelatepa Republic Day amungdang, sepaitem rüjep lendong nung asür. Ni parnok nem tetushi agütsür,” ta ashi.
Iba onük tenzükdang Ato kilonseri lanurtem dang, January 30 nü Martyr’s Day anogomung nung minute 2 mokremer Mahatma Gandhi bilemtettsü ajungshi.
Paisa lanurtem dang, taküm Ashok Chakra takok angusang, asür Havildar Hangpan Dada otsü social media ajanga lemsatepang, ta mepishi.