ULB elections magii atar, tanü nungi mokdangba agiener

Dimapur, January 30 (TYO) : Nagaland sorkari February 1 nü ULB elections agitsüsa ta shiyonga aru saka Hombarnü sorkari election magii atatsü telemtetba agiogo aser iba nung ajemdaker Joint Coordination Committee(JCC)-ia January 31 nungi mokdangba malitsü lemtetogo.
Hombarnü Police complex, Chumukedima, Dimapur nung Nagaland Baptist Church Council (NBCC)-i acha-ayanga state sorkar aser JCC den senden ka amendang iba telemtetba agia liasü. Senden nung chief minister TR Zeliang-i anir state sorkar aser convenor Sobu Jamir-i anir Joint Coordination Committee (JCC) pur aden.
Nagaland sorkar aser Joint Coordination Committee tsüngda tekong merangtepa anogo ishika arudang tensa kanga mejungi akümtsüsa liasü saka Nagaland Baptist Churches’ Council(NBCC)-i kanga dang shisa kaa telok ana tsüngda yimjung yangluogo.
Tanü JCC tenüng nung Convenor Subu Jamir, Nagaland sorkar tenüng nung Home Minister Y Patton aser NBCC General Secretary, Rev Dr Zelhou Keyho nungertemi külem tenangzüktep agiba nung sign asü.
JCC-i kin telok balala den jembishinü asütsü aser tetsür nem shilem 33 lemzükja ULBs election agitsü atema mapa inyaktsü atema JCC nem mapang agüjanga ta tanü senden nung NBCC-i State sorkar dang mepishi.
JCC-i Nagaland nung tetsür nem shilem 33 lemzükja ULB election timi agitsü atema telok balala den jembishinütsü atema ita ana meshisem. Asüng, January 31 anepdang State Cabinet senden nung jembitsü aser ibaji Election Commission-i agizükba sülen ang mapang tejangja metettsü, ta tanü Chief Minister office sangdong ka nung metetdaktsü.
JCC convenor, Sobu Jamir-ia ashiba agi, committee nem mapang agütsüba sülen, parnoki telok ajak den ajurutepa Nagaland Municipal Act dak sendakba onüktem jembitsü aser iba sülen state sorkar den tatembangba olemtep agitsü.
JCC-i sangdong ka nung Chief minister aser Home minister nati Naga nunger taginüba kümzüka ayutsü mechi nung shisa kaa telemtetba agiba atema tenüngsang agütsü. JCC-isa NBCC-i state sorkar den olemtep alitsü acha-ayanga mapa inyakba atema pelaba metetdaktsü.
Maneni, JCC-isa Naga Council, Dimapur, Nagaland Central Tribes Council, Ao Senden, Angami Public Organisation, Sumi Hoho, Lotha Hoho, Chakhesang Public Organisation aser Eastern Naga People’s Organization kübok parnoki otsüsütsü süa mokdangtsü ayongzükba nung anibelem jenti arema shilem agirtem ajak dang pelaba metetdaktsü.
Naga nunger taginüba angateta aser akhümtsübua tenüng meyipa agiba candidate ajak dang pelar, ta JCC-isa metetdaktsü.
Külen, Hombarnep 7:00 ako nungi tenzüka JCC-i mapang tatakzük makai lungkak aitba sentong tiptema agi, ajisüaka gari ka nung electoral voter lists kar angubabo raksa endoktsü.
Dimapur nung Circuit House leni aoba gari ka volunteer temi sota reprangdang, gari nung voter lists bena aliba angu aser ibaji Circuit House gate anasa mi senokja rongdoktsü.
Iba tatalokba sülen, volunteer temi Circuit House telung nung election dak sendakba maparen inyaker asütsü akok ta temulung melemi bilemba agi telungi ia mita reprang, saka election dak sendakba papers/document kecha mangu.
Iba mapang riot police pur Circuit House tonga aru saka JCC züngsemtemi volunteer tem mesüzük aser parnok Circuit House nungi senshi.
Tanü police aser district administration-i Dimapur kübok tesem aika nung security kanga akanga mapa lemzükja liasü.