Austria nung tetsürtem tejak meyibangba nokdanger

Vienna, January 31 (Agencies) : Austria nung lenirtemi okadak, school aser nüburtem senzüsempongba tesemtem nung tetsürtem tejang rangben meyibangba nokdanger,” ta Mongulbarnü osangbenertemi metetdaktsü.
Iba tenokdangba nungji tetsürtemi tejak meyibangba naqab aser burqa na densema lir. Iba ama tejak rangben aser tejak o temang ajunga meyibangba yimya ya Muslim amanger tetsürtemi amshir.
Linük nung yimsüsür telok Social Democrats aser centrist People’s party nati iba mera agiba ya December ita Tir election nung tamakok anguba telok, Freedom Party den tokteper amai bilemer.
Centrist teloktep telok ya taoba hopta sorkar indang tarutsü nükjidong atema tetuyuba agütsüba sülen tera agidang loksa mao.
“Tejak rangben meyibangba yimya ya nüburtem adenshiba aser senzüsempongba tesemtem nung nokdanger, aser ibaji ita 18 atema alitsü,” ta Chancellor, Christian Kern-i iba telemtetba agiba sülen metetdaktsü.
“Iba telemtetba nung manidaktetertemi linük toktsür aotsüla,” ta Hombarnü yimsüsürtemi sangdong ka nung shia lir.
“Onoki sadoka aliba lokti dak amanger, aser temang rangben meyibangbaji onoki amangba anema lir anungji ibaji nokdanger,” ta sangdong nungji lir.
Iba telemtetba nung police ketdangsertem, okatsürtem aser magistrate tema tekolak meyiba nokdanger, ta shia lir.
Iba ama ozüng ya küm trok tejanglen France sorkari khen benoka liasü aser iba mapang iba ama nokdangbaji European Union kübok France linük mezüng liasü.
Parnoki iba mapang tetsüri tejak meyibangba sü burka aser naqab na memeyitsü nokdang.
2016 December ita nung Germany chancellor Angela Merkel-i tejang rangben meyibangba nokdang liasü.