Guwahati nung ‘No Horn Ok Please’ sentong agi

Guwahati, January 31 (agencies): Lemang nung gari anitsü yimya balala dak sendakba nung lokti nem tangatetba agütsütsü nükjidong nung ajemdaker Young Indians (YI) aser Guwahati City Traffic Police na senteper ‘No Horn Ok Please’ Campaign ayong.
Iba sentong nung gari anenba nung tekümdangtsü, aser horn mashimashi agütsüba anendaktsütsü asoshi tesayuba balala agütsü.
‘Horn Not Ok Please’ campaign ya linük ajunga nung YI aser youth wing of Confederation of Indian Industries (CII)-i horn nüngdak makaba nung mashi agütsüba anema ayonga agir.
“Neburtem aikati traffic indang temzüng aser ozüngtem memetet, aser iba ajanga gari tali mejeptepba den nüngdak maka ola aika akümer. Horn agütsüba ajanga gari mejeptepba timtem atema teyari magütsür, ta Additional Deputy Commissioner of Police (DCP) Budhindra Morang-i osangbenertem dang ashi.
“Iba sentong January 31 nungi March 31 tashi agitsü. Ola tali adokba aser gari aniba nung kümzüka alitsü asoshi yimya balala tesayuba agütsütsü nükjidong nung iba sentong ayong,” ta Young Indians, Guwahati Chapter Chairperson Mehtaj Zaman Ahmed-i ashi.