Mejangjatetba nisungtemi Industries & Commerce Director’er kidang injang kahloktsü

Dimapur, January 31 (TYO) : Hombar aonung 12:00 meta Science Centre, Naga Shopping Arcade tesülen nija ki ka nung mejangjatetba nisung kari injang kahloktsü. Ajisüaka, iba tatalokba nung nisung nisung meyiru.
Ki kiburji Industries & Commerce Director, I. Bendangliba lir aser pa iba mapang kidang maliasü. Pa tang Kohima nung mapa lemzüka lir.
Par kinünger kati ashiba agi, pa shinga den tsükchitepba mali aser kechiba par kidang injnag kahloktsüar mejangja.
Ki kima nung aliba ‘iron gate’ nung injang ana kahloktsü tarak aser kichiba indang aina nung injang asem-pezü ka akahba tarak liasü.
Ki anükeri ola angashiba sülen kima alua reprang saka pai kech mangu, ta osang angazüker.
Tanep pai ‘gate’ anasa AK prangpong indang injang tazüng tenet angu. Itemji police ket nung agütsü aser iba dak sendakba nung FIR ka benokogo.