Sorkari ashiba nung ajemdaker SEC-i Council 7 nung ULB elections athir; High Court-i state sorkar dang ULB elections agitsü teyu

Kohima, Jan. 31 (TYO) : Nagaland State Election Commission (SEC)-i Nagaland nung ita ana atema Urban Local Bodies (ULBs) tenet nung election magii atatsü osang metetdaktsüogo.
Tanü State Cabinet-i telemtetba agiba jungjunga shisadangba sülen aser Nagaland Municipal Act 2001 kübok tashi agüja aliba nung ajemdaker SEC-i election thinena atatsü telemtetba agi, ta State Election Commissioner, Sentiyanger Imchen-i sangdong nung shia lir.
Nagaland nung ULBs indang election asüng agitsü anogo lemteta lir, ajisüaka tongti kin teloktemi tetsür nem shilem 33 lemzükja election agitsü atema sorkar lemtetba anema nokdaker.
Mongulbarnü State Cabinet senden nung Municipal aser Town Council 7 nung election magii atatsü atema State Commission dangi abentsü lemtet.
Sorkari election magi atatsü shimba council temji- Dimapur Municipal, East Dimapur Town, Kiphire Town, Tseminyu Town, Bhandari Town, Wokha Town aser Zunheboto Town Council tem lir.
Yashi Dimapur nung Nagaland Baptist Church Council tsüngdang State sorkar aser Joint Coordination Committee tsüngda tenangzüktep agiba nung ajemdaker State Cabinet-i iba telemtetba ya agi.
State Cabinet-i district administration aser IGP (Intelligence) den osangtsüsang agitepba sülen council tenet nung election thinena atatsü atema telemtetba agi. Ajisüaka, Cabinet-i asüng town council 12 nung election agitsü lemtet aser ibaji lemteta alima ama anepdang 7:00 ako nungi nikongdang 3:30 ako tsüngda agitsü.
UBLs election agitsü atema Town Council temji- i Peren, Jalukie, Tening, Aboi, Tobu, Tizit, Naginimora, Shamator, Noklak, Pungro, Longkhim aser Longleng nung lir.
Külen, Meluri, Phek aser Tuli town council tem nungbo tetokteper shinga mali takok angur anungji item tesem asem nungbo polling malitsü, ta Cabinet-isa telemtetba agi.
Municipality aser Town Council 10 nung (-Kohima, Mokokchung, Pfutsero, Chozouba, Changtongya, Mangkolemba, Tuensang, Mon, Medziphema & Chumukedima) election nung tokteptsüpur tenüng ka dang magütsüba agi election magitsü, ta Cabinet-isa lemtet.
Maneni, tanü CMO indang sangdong ka nung ashiba agi, Guwahati High Court-i state sorkar dang Nagaland state nung tetsür nem shilem 33 lemzükja Municipalities and Town Councils tentettsüla ta tetuyuba agütsüogo.
Nagaland nung telok kari election anema nokdaker aser election timi magidaktsür, anungji state sorkar dang tetsür nem shilem 33 lemzükja ULBs indang election timi agitsü tetuyuba agüjang ta Naga tsür kati okadak ken o benokba sülen iba tetuyuba ya agütsü, ta CMO sangdong nung shia lir.
Iba tetuyuba ya Chief Justice Ajit Singh aser Justice Achintya Malla Bujor Barua nati agütsü, ta sangdong nungsa shisem.