Rev. Dr. Mar Atsongchanger Israel nung ita ana amungtsü

Dimapur, February 04 (TYOP) : Yirusalem nung aliba Swedish Theological Institute nung International course ka, “Sustainable land-land, people, Theology and sustainable development in Israel and Palestine” omen nung ajemdaker February 05 nungi March 24, 2017 tashi ayongzüka kar aser yangji asen lenir, Rev. Dr. Mar Atsongchanger ABAM Executive Secretary-a oa adentsü, ta ABAM Impur media cell-i sangdong ka ajanga metetdaktsü.
Iba sentong ya alima ajunga nungi nisung 15 shimteta shisatokden shilem agiba sentong ka lir, aser item nisung 15 rongnungi Rev. Dr. Mar Atsongchanger ABAM Executive Secretary densemba ya maongka tulu aser Mungdang asoshia akhüm tulu ta Mungdangi pelaba lemsatepa Tsüngrem tenüng sanga iba osangkaket azüngertem dang metetdaktsür, ta sangdong nungsa shia lir.
Pai shilem agiba ajanga Naga nunger ajak asoshi mera tasen aser tajung ka yangertettsü ta angateta, amangbapur ajaki asen lenir mapa ajak nung takok asoshi Tsüngrem nungi teyari meshitsüdi, ta iba tepela sangdong ajanga ayongzüker, ta Media Cell ABAM Impur-isa metetdaktsü.