Kiralongrar yarir linük tulutibaji Iran:Mattis

Tokyo, February 4 (Agencies) : US-i Iran nem tenokdangba kar agütsüba aser parnoki missile ka tendanger mapang tatsüka lir külen US Defense Secretary James Mattis-i, Iran ji kiralongrartem yariba linük tulutiba lir, ta ashi.
“Jungjunga asadangra linük ka kijai kiralongrar yariba linük tulutiba rongnung Iran ya tanabuba linük lir,” ta Hokolbarnü Mattis-i Tokyo nung osangbenertem dang ashi.
Pai, Middle East nung sepai talila yoktsü kecha tenüngdaktsü mali amai reprangteter, ta shisem.
“Tang tangbo Middle East nung onok sepai talila yoktsü menüngdaker. Tang iba asoshi tebilemba kecha balaka mali,” ta pai ashi.
“Onok dak sepai talila yoksemtsü tashi peria lir, ajisüaka tangbo ibaji menüngdak,” ta paisa ashi.
Taoba Deobarnü Iran-i medium-range missile ka tendanga liasü aser ba mapaji UN Security Council temzüng anema lir ta White House-i aitsü.
Tehran-i missile tendangba osang tejangja agütsüogo, ajisüaka parnoki iba tendangbaji ajanga 2015 küm renemba nuclear temzüng meraksatsür, ta ashi.
Tir Donald Trump-i taoba Tir Barack Obama inyakyim karbo takok mangutsü ta shia aru.
“Obama-i inyakbaji senzüka meyutsütsüla mesüra khenyongi meinyak anen nunga majung,” ta Obama inyakyim temai adoka meshii Mattis-i ashi.
US Treasury-i, Iran nung missile tendangba sülen nungi Iran nunger nisung 13 aser par linük nungi company 12 nem US-i tenokdangba agütsüogo, ta Hokolbarnü ashi.
US-i tenük yokertemji Iran nunger shishilembar Abdollah Asgharzadeh-a ka lir. Treasury-i Abdollah ya ballistic missile sentong nung missile bendener nisung ka lir ta tai tonglokja lir.
US-i onok nokdangbaji ozüng alema lir anungji onokia ozüng dak ajemdaker America nunger kiralongrar yaritem nokdangtsü, ta Iran foreign ministry sangdong ka ajanga metetdaktsüogo.