AYO-i NPF Youth Wing aitsür

Dimapur, February 4 (TYO) : January 3, 2017 nü osangkaket balala nung NPF Youth Wing-i State sorkar telemtetba pusema sangdong agütsübaji temenünütsüka aser kuli kecha mali, ta Angami Youth Organization(AYO)-i tanü ashi.
Rio mesüra Imkong nati Kin hohotem ajungmesoa sorkar anema mapa inyakdaktsür ta NPF Youth Wing-i kuli kecha melii jembibaji lokti atema inyakba mapa mezüngmeshiba lir. Iba onük nung onoki tena den tesentaktep kecha mali aser tesentaktep ayutsüa jangraa mali, ta AYO Publicity Cell-i sangdong ka nung metetdaktsü.
NPF Youth Wing-i tali shia meteta lir ama mapa meinyaktsüla aser nenok tashi alia mejembitsüla, ta AYO-isa ashi.
NPF-i aniba DAN sorkari Naga nunger den meputepba mesüra lendong aketba ozüngtem mesüra asalentong meyanglutsü ta nenoki shiogo saka iba ya kanga dang temenünütsü aketba olen ka lir, kechiyong municipal elections agitsü atema nür sorkari pusema telemtetba agibaji Naga nunger asoshi lendong keta liasü, ta AYO-i sangdong nung metetdaktsü.
ULB Municipal election ajanga asen loktiliba nung mepetmesü aser telemsa adokdaktsüogo ta NPF Youth Wing-i ashibaji kanga shitak, kechiyong nübortemi ola adokba sorkari mangashi, nübortem temeten ajembang aser Home Minister-i sorkar tenüng nung Arogo den tenangzüktep agiba amajok kümdaktsü. Item ajakji sorkari inyakba liasü, ta AYO-isa ashi.
“Iba ama inyakyim lira, Naga nunger kodanga melongjemtettsü ta nenoki shiogo aser ibajia kanga shitak lir, kechiyong tang asenoki ajurua aliba tensa ta sorkari teinyaktsü tim meinyakba ajanga ajuruba lir” ta AYO Publicity Cell sangdong nungsa shia lir.
“Nenoki tasür kibongtem den asüku lemsatepa tiyazü nüktzü alua sayubaji tim masü, kechiyong nenoki tepsetba lanur ana indang azü aser mangyimer nüktzütemji o kecha agia malangzüktettsü. Tsüngremi nenok nem taidok agüjangma” ta AYO-isa metetdaktsüogo.