Nokinketer Vizo Metha aser Bendangba na nem Ao Sendeni konang tetushi agüja sentong ka ayonga katsü

Mokokchung, Feb 4 (TYO): Ao Senden Joint Co-ordination Committee-i achaayanga Jan. 31 aonung nübur temeden asoshi raradang asür Sp. Vizo Metha aser Sp. Bendangnungsang na nem akhümtsübu aser konang tetushi agütsüba sentong tajung ka Honibarnep Mokokchung police point nung ayongzüka katsüogo.
Iba sentong agiba mapang Mokokchung nung dokan, office, riju kata melapok aser garitema mejajai nübur aika adenshia nokinketer ana nem akhüm tetushi agüja liasü.
Tesentepertemi shitipak balala nung T.R Zeliang aser pai aniba sorkar inyakyim aitsüba den temeden o aser nokinketer nem tetushiba agütsüba o balala amer iba sentong akhümketa agi.
Tanü iba sentong nung Ao Senden tir bena alisang Wb. C. Angang Jamiri jembidang, nokinketer Vizo Metha aser Bendangnungsang nati Naga lima asoshi taküm tenla agütsüba ya nübur mulungjang nung teti alitsü, ta metetdaktsü.
Nokinketer asür kinünger anaprong den Ao Sendenia asükhu tako marok lemsateper aser Tsüngremi par kinungertem nem anisüngzük agüjangma ta sarasadem ola ka tirisa metetdaktsü.
Municipal aser Town council election maparen dak sentakba nung kija aser telok shirnokisa lenla balala ajanga Ao Senden den yaritepa arudagi, parnok ajak dang pelar aser tarutsü nunga maneni kasa tangatetba nung amaliteptsü imlar, ta Ao Senden tirisa pelaba olen ka lemsatep.
Tanü maparen ka tembanga arur, aji saka, state sorkari nübur aginüba ama meinyakra ano maneni raratsü wadang anünga alinung, iba asoshi ajaki renema atatsü mepishir, ta paisa tayongzükba ka agütsüogo.
Iba sentong nung Mokokchung town Likapur, All Ward Union Mokokchung Town, Ao Kaketshir Mungdang (AKM) nungi ketdangpurtemia shilem agia konang tetushi o den tayongzükba balala lemsatepa liasü.
Mokdang sentong ya khen atema anena atar, ajisüaka sorkar nungi telangzüba tajung mengutetra, Naga nunger temeden asoshi ano Ao Sendeni tapet mera agia maneni raratsü terenemba lir, ta osang ajanga angazüker.