Takoksa tulu

Tang Nagaland nung state government-i nübortemi maginüba sentong ka tashiyim agi agitsü merangba ajanga kodanga kecha agia memenoktettsüsa tesama aser takoksa tulu ajuruogo. Nübortemi municipal aser town council election maginer saka state government-i kanga aginür ta atsütepba ajanga mepetmesü aser lendong timtem adoktsüsa inyakbajibo sorkar nung alirtemi kanga mebilemdangi inyakba mapa ka asütsü. Jungjunga bilemdangra, state nung nübortemi memulungba mapa ka, tajung süaka, tashiyim agi inyaktsübaji nüngdak madoker. Tatishitsü agi, yimtsüng ka tonga gari lenmang yanglutsütsübaji yimtaklirtem asoshi tajung saka yimtaklirtem jagi memulungra tashiyim agi gari lenmangji yanglutsütsü nüngdak madoker. Iba kasaji nübortemi memulungba mapa ka government-i tashiyim agi inyaktsü merangba mapaji government nung alirtem asoshi ozüng raksaba mapa ka inyaker amato asütsü. Aji oda, tanü nübortemi longkak aita election magili ta nokdaksümonga tenük amur election agitsü merangbaji nübortem anema apusoba mapa ka liasü. Iba jagi lendong tulu atalokogo. Akhidangbo, India government-i Nagaland nung election agitsü merangaka Naga nunger shiangaia election nung shilem magiba Naga nunger yimten otsü nung lir, ajisüaka tanübo India temzüng nung ajemdaker Nagaland government-i nübortemi memulungaka tashiyim agi election agitsü merangbaji asenoksasa asenok atutsü yanglua ayuba jenjangmong ka ajemdoker amato inyakogo. Atangji, pei lima aser nübortem ajungtsü inyakdang government-i dang masü saka nübortemia tashiyim amshitsü menüngdaker. Yimten nung balaka tashiyim agi mapa ka inyaktsü mesüra meinyakdaktsütsü merangba agi takoksa tulu ajurur aser tashiyim agi takok anguba mapajibo mapang tatsüka tsüngda tamakitsü kümadoker. Asenoki aiben tashiyim mamshii government anema nokdakba agi government makoktsü amai bilemer. Ajisüaka, tashiyim agi masü saka tangatetba nung longjemer nokdakra government-a marakzüktettsü. Aji oda, tashiyim amshia government meyong kiojen merongdoktsüyonga mesüra gari meraksatsüyonga lenmang lendi nung mesüra government mapa inyakdak tongtibang tesem kar mendanga yur yangji longkak aita mongra, iba jagi government nung alir yimsüsürtem mulungjang arakzütsü. Atangji, Nagaland nungbo telok kari tashiyim agi masü saka timi state government dang pei tangutsü tim meshia longkak ait nunga tzü agi ainer aser ano government nung ochimashi mapatem anema kari lokti senden ayongzük nunga tzü agi ina meindoker, anungji government anemabo ola adoktsüla masüba jenjang ka nung nübortem yuja lir. Iba ama tensa tia ka nung tang nübortemi Urbal Local Bodies election magili ta nokdakogo. Tangbo ULB election magitet süiogo aser tesem kar nung agia alibatema tamakitsü kümdaktsüogo aser tetsürtem nem 33% shiteta yutsüba ozüng melenshitsüsa kümogo. Iba dakji alaka tangbo nübortemi chief minister, T.R.Zeliang menden nungi alung ta akanger. Item ajakji tashiyim mamshii nübortemi mulungba inyaktsü mangatetba aser memulungba ajanga atalokbatem lir. Aji oda, nübortem mulung masü kü mulung, nübortem meyong masü kü meyong aser nübortem nem agütsütsü masü saka ni agitsü ta yimsüsürtemi nübortem masü pei agitsü angatetba ajanga nübortem nüngdak aser taginüba yimsüsürtemi mangatetter. Iba amaji nübortem lenchii oagi angatetdaktsütsü aser nübortem den külemi nübortem asoshi inyaktsü melen, pei tajangzük angutsü dang bilema Delhi nung oagi lemzüktsütsü aliba sen dakji dang ranglokra, teti tanü atalokba ama yimsüsürtem o nübortem na tsüngda tsükchi yimteptsü. Joko, government tsütsü asüyonga nübortem tsütsü asüyonga tashiyim agi masü saka tangatetba agi pei lima meima inyaktsü mapang tongogo. Aji oda, sen masü nübortem meimtsüla aser kiojen masü ochimashi aser tim masüba mapatem raksaktsütsüla.