Naga Hoho & NPRAAF-i state sorkar aitsür

Dimapur, February 5 (TYO) : Nagaland sorkari nübortem ola mangaba ajanga nisung ana taküm lalu, aika yiruyibong aser teraksa jenti bener aruogo, ta Naga Hoho-i tanü sangdong ka nung metetdaktsüogo.
Naga Hoho-i ULBs indang election aser municipal act anema noktak aser iba asoshi senden aiben menogo aser sorkar nema mapang atakzüktsü, saka sorkari ibaji meinyak, ta parnokisa ashi.
Sorkari meshisadangi inyakba ajanga asür Bendangnungsang aser asür Khriesavizo Metha na taküm sama aser ano nisung aika yirutsüba kukua aitsür. Naga Hoho-i tasür kibongtem den asüku lemsateper aser tena tanüla teti anisüngzük ngudakjang ta sarasademtsür, ta sangdong nungsa metetdaktsü.
Kodang sorkar nung mangdang alir aser tangatetba shitak alirtemi ketdang südir, temeten alir saka kodang tashi aginür aser ochimashirtem sorkar ketdangsüdir, parnoki nübortemi ola adokba aser kangshiba mangashir aser mangur. Nagaland nung tang aliba sorkari nübortem ola mangashir aser tenangzükba agiba ashioktsür. Iba sorkari nübor madak yimsü asütsü temeten mali kümogo, anungji lennirtem dak mulungsentsü keta lira, timi nenok menden nungi alutsüla, ta Naga Hoho-isa ashi.
January 31, 2017 aonung 3rd Mile Dimapur nung Chief Minister’er kima Bendangnungsang Longkumer aser Khriesavizo Metha na kahsetba kukua aitsür, ta Nagaland Public Rights Awareness and Action Forum (NPRAAF)-i sangdong ka nung metetdaktsü.
January 31, 2017 nü Chumukedima, Dimapur nung NBCC-i kulisüa Joint Coordination Committee (JCC) aser State sorkar tsüngda ULB elections thinena atatsü nangzüktepba meraksa asübo iba lendong mataloki lila, ta NPRAAF-isa ashi.
Arogo kaji Tsüngrem temeshi reju ka ama züngshir aser arogo dena ashioktsüba State sorkar dak temulung malemer aser nübortem iba sorkar dak tamang makai kümogo. Anungji, Chief Minister TR Zeliang-i anir par Cabinet ajaki tangsa tang menden tokjang ta NPRAAF-i mepishir.
Center dangi nungi paramilitary Forces talila meshisemba mesüra menden metoktsütsü meranga MLA tem sign meshiba inyakyim anener Chief Minister aser par Cabinet-i menden nungi alutsüla.
Ano, State Cabinet-i kanga dang shisamakai Prime minister dang Linük Temzüng nung IX-A shilem nung Nagaland medendaktsütsü atema telemtetba agiba metetdaktsüogo. Sorkari 2012 küm iba ordinance magitsü lemtet ajisüaka ano November 2016 nung sorkarisa iba ordinance agizüktsü lemteta liasü. Tang kanga terata tia nung aliba sorkar nung MLA 60-i Prime Minister dangi aotsü nüngdak madoker saka 2012 küm lemtetba agitsü aser 2016 küm lemtetba meyipa agitsü atema special Assembly session ka jazüka amentsüla, ta Information and Publicity Wing, NPRAAF sangdong nung metetdaktsü.
Sorkari tetsür nem shilem lemzüktsübaji tajung ta shia nübortem anema ULB election agibaji aibelen ka liasü. Ajisüaka, Naga nunger olasa tulutiba aser NPRAAF-ia iba onük nung civil society tem pusema nungiter, ta sangdong nungsa shia lir.
Tatemsa NPF-i iba tensa ya Chief Minister TR Zeliang aser MP (Lok Sabha) Nephiu Rio na tsüngda tashi toktepba mapa ka ama mekümdaktsütsüla, kechiyong civil society temi ULB elections anema noktakyonga aru aser iba asoshi Lok Sabha MP-i Delhi nungi Nagaland-i meyipa aruba nung tai aputsü matoker, ta NPRAAF-isa metetdaktsü.