VK Sasikala-i TN Chief Minister inyaktsü

Chennai, February 5 (Agencies) : Mapang talangka asür J Jayalalithaa den yaritepa arur VK Sasikala-i Tamil Nadu nung Chief Minister inyaktsü.
Tanü anüngdang AIADMK senden ka nung Tamil Nadu chief minister O Panneerselvam-i AIADMK legislature party lennir asütsü atema Sasikala tenüng benoka teloki la shim aser iba sülen Panneerselvam-i chief minister menden toktsüba osang metetdaktsü.
Mapang tatsüka AIADMK telok sasep nung kanga atsütepa aruogo aser nisung kari state sorkar nung tashi balala alibaji majung ta shia liasü.
Tanü VK Sasikala-i general secretary mapa mebenzükdang tamasa AIADMK tenzüksang MGR nem tetushi agütsü.
Asür Jayalalithaa taküm alidang lai chief minister aser party tekolak mapa anaprong inyaka liasü. Jayalalithaa asüba sülen Sasikala-i la tsüngsü sülen anidaktsü ta yimjak nung nangzük. Nisung aikati taküm January ita metembang Sasikala-i chief minister mapa melenzüka inyaktsü ta imla liasü saka Jallikattu atema nübortemi lungkak aitba ajanga tensa mejungi aküm aser iba ajanga lai chief minister benzüktsü asoshi menu, ta osang kar ajanga ashi.
Arishi küm 61 tain Sasikala ya state assembly nung züngsem ka masü aser lai taoba mapang AIADMK nung mapa kecha meinyak.