NTAC-i State Cabinet indang telemtetba aitsür

Dimapur, February 5 (TYO) : Nagaland Cabinet-i Prime Minister dang tezüluba ka ajanga India Linük Temzüng nung Part IX-A yanglushitsü atema asüngdangtsü ta sangdongbaji NTAC aser state nung nüji nisungtem ajak aoksar, ta NTAC-i sangdong ka nung metetdaktsüogo.
Nagaland Assembly-i state nung nüngdakba ama ozüngtem yanglutsü mesüra yanglushitsü tashi agüja lir ta Nagaland nung alirtemi kanga junga meteta lir, ta NTAC Convener, K.T Vilie aser Secretary, C.T Jamir nati sangdong nung ashi.
Temzüngi tashi agüja aliba ama Nagaland Assembly-i Article 371(A) amshia Nagaland Municipal Act 2001 aser tanga ozüngtem yanglu. Iba kasa tashiji amshia parnoki tanga ozüngtema yanglushia amshir. Ajisüaka, Nagaland state Cabinet-i India Prime Minister dang ordinance ka ajanga Linük Temzüng nung Part IX-A nung temelenshi asütsü asüngdangbaji kanga dang taoksatsüka lir. Iba inyakyim ajanga Cabinet-i State Assembly, Democracy aser state nung nübortem mezüngmeshiogo, ta NTAC-isa metetdaktsü.
Ajak dang tamajungtibaji, Cabinet-i iba telemtetba agibaji Linük Temzüng nung Article 371 (A) yoka achiba lir. Anungji, state asoshi teraksa talila bener marutsüdang Chief Minister-i pa menden nungi anentsüla, ta parnokisa takhangba agütsü.

NTAC-i nübortem ayongzüker

Dimapur, February 5 (TYO) : Tai maketba lanur ana taküm laluba sülen nübortemi Nagaland state sorkar anema inyakba mapa nung Government servant aser public temi maneni amalitepa yariteptsü ayongzüker, ta NTAC, Kohima-i sangdong ka nung metetdaktsü.
“Tensa tajungba kümdaktsütsü atema sorkar dang nungi temeten meshia lungkak aitba ya ajak ajungtsü atema lir. Tang tashi nenoki yaritepba atema kanga pelar aser takhangba asoshi telangzüba mangutsü tashi maneni nenok teyari aser amalitep aginür,” ta NTAC mendenpurtemisa sangdong metetdaktsüogo.