Assam nung nisung 250 den kuli kaket taila 2,000 dak tema apu

Guwahati, February 6 (Agencies): Assam nung Register of Citizens (NRC) repranga yanglushiba mapang nung nisung 250 apur aser maitsü kulikaket taila 2,000 dak tema puogo.
Tesem tonga orr reprangshiba nung application form lakh 68.21 bo temogo, aser office nung kulikaket crore 6.14 nungi shilem 93.32 bo tang tashi nung temogo.
Item osangtem tanü Legislative Assembly nung ashishitepdang, Chief Minister Sarbananda Sonowal, shibai Home portfolio dena bensema ali, pa tenüng nung Parliamentary Affairs Minister Chandra Mohan Patowary-i telangzüba agütsü.
Patowary-i ashiba agi, kulikaket lakh 4.18 jangjashitsü atema tanga state-i bener yok, aser item rongnungi tang tashi nung kuli kaket 73,183 meyipa aruogo. Iba den külemi kuli kaket 402 linük tsüngda jangja shiteptsü alinung, Indian Embassies, High Commissions nungertem ajanga jangjashitsü asoshi Ministry of External Affairs dangi yokogo. Kuli kaket 47 jangjashir arua tongogo.
NRC reprangshiba sentong nung kuli kaket taila agütsüba ken o nung parnok 273 puogo, ta minister-i shisem.
Pua alirtem rongnung Karimganj district nungi parnok nisung 35, Hojai nungi 26, Sonitpur nungi 25 aser Kokrajhar district nungi 25, ta pua lir. Tang tashi nung kuli kaket taila 2000 puteta lir, aser item rongnungi Nagaon district nungi 1175 aser Karbi Anglong nungi 1108 ta putetogo.
Patowary-isa ashiba agi, NRC repranga yanglushiba sentong, Supreme Court / Registrar General of India / Ministry of Home Affairs-i reprangerang tembangtsü.