Irom Sharmila-i Ibobi Singh den tokteptsü

Imphal, February 06 (Agencies): Taruba ita agitsü aliba Manipur assembly election nung meimchir temeten atema inyaker, Irom Sharmila-i Thoubal constituency nung state Chief Minister aser Congress lenir, Okram Ibobi Singh den tokteptsü.
Sharmila-i Thoubal menden nungi tokteptsü, ta lar party People’s Resurgence and Justice Alliance (PRJA) Convenor, Erendro Leichonbami-i metetdaktsü.
Sharmila-i Armed Forces Special Powers Act (AFSPA) anema raraa liasü. Sharmila ya yimtenren nung tajangshiba mali. Ajisüaka state nung Ibobi Singh bo asembenren Chief Minister inyaker.
February 3, 2017 nü Congress-i Manipur Assembly elections atema candidate tenüng 60 sangdongogo.
Yaküm August ita nung arishi küm 44 Irom Sharmila-i küm 16 tashi lumia aruba anena liasü, aser iba mapang nung lai, AFSPA anema yimtenren ajanga raratsü asoshi lai chief minister kümner, ta sangdonga liasü.
Yaküm October ita nung lar party, PRJA tenzükdang Sharmila-i, lai menden ana- Thoubal aser Khurai na nungi tokteptsü, ta sangdonga liasü.
La ya Khurai nungi lir saka Thoubal yabo Ibobi Singh adokba constituency of lir.
Leichonbam-isa, party-i Sharmila atema Thoubal nung election nüboyim sentong tenzükogo ta metetdaktsü, ajisüaka la Khurai menden nungi tokteptsü osangbo mangazüker.
Tawa Leichonbam-i, PRJA election temaitsü atema ‘whistle’ amshitsü benokba agizükogo aser party-i candidate 10 toktepdaktsütsü, ta sangdongogo.
Ano külen Nagaland nung sorkar tashi nung aliba party, Naga People’s Front (NPF)-ia Manipur Assembly elections atema candidate 15 sangdongogo.