Kohima nung St. Luke School meshiteta lapokogo

Kohima, February 06 (TYO): Tamendakdak tajung agüja shisaliok tajung agütsütsü nükjidong nung St. Luke Church, Phezoucha Yasogei, New Secretariat, Kohima nung tanurtem atema Class A nungi 1 tashi primary school, St. Luke School ka lapokogo.
Tang tasen yangluba school building ji NPSC anasa lir aser iba school ji tanü Hombarnü Christ King Parish Parish Preist, Rev. Fr. Dr. Peter Salew, SDB-i meshiteta sarasademtsü aser Catholic Association of Nagaland (CAN) Treasurer, Mezhü-o Marcus Solo-i lapoktsüogo.
Taküm küm atema tang tashi nung tanur 60 bo tenüng zülüokogo.
Iba sentong nung jembidang CAN Treasurer, Solo-i, iba school nung tang primary level nung kaketshisatsü agüjaka khenlirbo high school aser higher secondary level tashi nunga shisaliok tajung agütsütsü imlar, ta metetdaktsü.
Paisa iba school nung kaketshirtem, tesayurtem aser tsüraburtem dang, tanurtem senso tajung ka akümtsü atema ajaki külem khuret kasa agitsüla, ta ayongzük.
Maneni pai tesayurtem dang, tanurtem nem kanga nendaka kaketshisatsü tajung agütsütsüla aser tsüraburtemia tanurtem tajungtiba nung anitettsüla, ta ashi.
Pai kaketshirtem danga, study asütsü atema tatidang mapang matatsüla, saka küm tetenzük nungi meranga study asütsüla, ta ayongzük.
Iba school kimongji Roko Paul-i angati tenla aser Catholic Union St. Luke Church-i iba school ketdangsütsü, ta Union President Mengukhrietuo Marcus Dzüvichü-i metetdaktsü.
Iba sentong ya Catholic Union St. Luke Church general secretary, Kelhoungnyü Joseph Vizo leniba nung agi aser vice president, Mhasimhalie Mathew Yhome-i tepela anküp o jembia liasü.