Naga nunger ajungtsü atema Part-IXA

Dimapur, February 6 (TYO) : Nagaland ULBs nung tetsür nem shilem 33 lemzükja election agitsü atema JACWR-i Supreme Court nung ken o ka benokba meyipa agiogo, saka iba ken o meyipa aginunga, nisung mashii kati tanaben iba ama ken o benoktsü akok. Iba amaji atalokra, iba onük ya tanga ang tenzüker ama akümtsü, ta Media Cell, Chief Minister’s Office sangdong ka nung metetdaktsüogo.
State sorkar aser iba onük dak sendakba teloktem tsüngda tekaratiba nung tangatettep kati marutettsü süra, Linük Temzüng nung Part-IXA nung Nagaland medendaktsütsüba inyakyimji tajungba asütsü ama ajiteter, ta sangdong nungsa shia lir.
Nagaland state nung Advocate General aser tanga ozüngren nung mongin nisungtemi Linük Temzüng nung Article 243T nung Part-IXA nung Nagaland denra, iba onük nung Article 371A ajanga asenok mekümzüktettsü ta jangjajangja shiogo. Anungji, State Cabinet-i Part- IXA nung Nagaland medendaktsütsü atema inyaktsü telemtetba agi, ta sangdong nungsa shia lir.
Part-IX (73rd Amendment) nung Nagaland madener aser ibaji Panchayats dak sendakba onük lir. Linük Temzüng nung Part-IX nung Nagaland state madenba ajanga, Naga nunger kin balala sobaliba nung ajemdaer Village Council tem tenteta lir, ta Media Cell-isa metetdaktsü.
Anungji, Linük Temzüng nung Part-IXA nung Nagaland medenra, Naga nungertemi aginüba ama Municipal Act yanglutettsü. Iba ajanga tetsür nem shilem 33 lemzükba ajanga Article 371 A ajembangtsü ta asüba tetsübu malitsü, ta parnokisa shisem.
Iba onük ya Naga nunger ajak atema lir, anungji tangatetba shitak aliba senso ajaki lenmang tajungtiba bushiba nung yariteptsü aser tebilemba lemsateptsü mepishir, ta Media Cell sangdong nungsa ashi.