Angh-i ayongba senden nung NTAC aser JCC maden

Kohima, February 6 (TYO) : State sorkar anema noktakba mapa ketdangsüa inyakertem- Nagaland Tribes Action Committee (NTAC) Kohima aser Joint Coordination Committee (JCC) nati tanü State Angh-i jaokba senden ka nung maden.
Tanü nikongdang 3:00 ako nung Nagaland Angh, P B Acharya-i Chief Minister Zeliang aser par Cabinet, NTAC Kohima aser arogo lennirtem külem senden ka amentsü jazük saka iba nung NTAC aser JCC maden.
Raj Bhavan nungi osang ka ajanga ashiba agi, Chief Minister T R Zeliang den par cabinet züngsem 5 arua Angh den sensaksem saka NTAC o JCC nungibo shinga maden.
Angh aser Chief Minister na tsüngda kechi koma jembi’ar iba osang kecha memetetdaktsü.
Tanü nikongdang JCC aser NTAC-i Angh dang senden nung madentsü ta züluba shidi ka nung, “onoki takhangba agütsüba nung temelenshi kecha mali aser iba nung olemtep malitsü saka T R Zeliang-i Chief Minister menden toktsüba sülen ang onük asoshi telatetba ka angutsü” ta zülua liasü.
Phek nung candidate kar ki raksatsüba aser Mokokchung district nungi Cabinet minister ka aridokba tatalokbatem ajanga nübortemi ULB elections, 2017 magizükba kuli sayuogo aser item tatalokba ajanga Nagaland nung Arogotem tentet tematiba Nagaland Baptist Churches Council (NBCC)-i tiyongtsüi aita January 30, 2017 nü Chumukedima nung tenangzükba ka agi, ta Angh dangi züluba shidi nungsa shia lir.
January 30, 2017 senden nung Chief minister aser Home Minister napronglai ita ana atema elections thinena atatsü mulunga agizük aser iba nung nübortemi sorkar dak teimla liasü. Ajisüaka, Cabinet-i nübortem taginüba anema telemtetba agi aser ibaji ajanga Dimapur nung tai maketba lanur ana taküm sama aser Dimapur o Longleng nung police injang agi nisung aika yiru. Cabinet-i telemtetba tai agiba ajanga sorkar office tem aser kiojentem raksatsüsa tensa ajuruogo, ta JCC aser NTAC-isa shidi nung metetdaktsü.
“Chief Minister-i nisung taküm samaba aser teraksa ajuruba atema tebilemtsü khuret abentsü melena aser pa menden nungi ajemajema alutsüla melena pai anemsü agi yimjung alitsü atema temepishi agütsü. Anungji, JCC aser NTAC Kohima nati Chief Minister lia olemtep kecha nunga shilem magitsü, kechiyong nübortemi pa dak joko tamang aser temulung alemba samaogo” ta shidi nungsa shia lir.
“Ajisüaka, Chief Minister medeni olemtep aliba nungbo JCC aser NTAC adentsü” ta parnokisa Angh dang metetdaktsüogo.
Dimapur kübok Chumukedima nung NBCC, JCC aser Sorkar tsüngda tenangzüktep agiba mali kümogo aser iba osang ya JCC-i Chief Minister danga metetdaktsüogo, ta JCC aser NTAC-isa shisem.